როგორ გავიგოთ, ვინ არის ჩვენი ოჯახის ექიმი, რომელსაც კორონავირუსისთვის დამახასიათებელი სიმპტომების დროს მივმართავთ?

COVID-19 - 13:29, 16 Nov, 2020

3105

იმ შემთხვევაში, თუ კორონავირუსისთვის დამახასიათებელი სიმპტომები გამოგვივლინდა, ტესტის გაკეთებამდე უნდა მივმართოთ ოჯახის ექიმს - ეს არის რეკომენდაცია, რომელსაც ჯანდაცვის სამინისტრო გამუდმებით იძლევა, თუმცა საზოგადოებაში გაჩნდა აზრთა სხვადასხვაობა - ზოგმა ეს მოწოდება არასწორად გაიგო და რეკავდა იმ კლინიკაში, სადაც აღრიცხვაზე იყო აყვანილი, რაც დამატებით პრობლემებს ქმნიდა, ზოგი ჯანდაცვის ცხელ ხაზზე რეკავდა, რათა სწორი მიმართულებით წასულიყო. ინფორმაციას კი რეალურად 112-ზე იძლეოდნენ და შემდეგ ხდებოდა ოჯახის ექიმთან გადამისამართება.
დღეიდან მოსახლეობას ოჯახის ექიმის პოვნა ჯანდაცვის სამინისტროს მიერ სპეციალურად შექმნილ პორტალზე შეეძლება. პორტალი მოქალაქეებს შესაძლებლობას მისცემს, გაარკვიონ, თუ ვის მიმართონ ან რომელ საავადმყოფოში წავიდნენ. ჯანდაცვის სამინისტროს ინფორმაციით, პორტალი 112-ისა და ჯანდაცვის სამინისტროს ცხელი ხაზების შესამსუბუქებლად შეიქმნა:
"პორტალი იქნება, სადაც მოქალაქეები თავიანთი პირადი ნომრებით გადაამოწმებენ, რომელ კლინიკაში არიან რეგისტრირებულნი და რომელი ოჯახის ექიმი ემსახურებათ, სახელი და გვარი მითითებული იქნება. ადამიანებს ექნებათ ინფორმაცია, საჭიროების შემთხვევაში, რომელ კლინიკას ან ექიმს უნდა მიმართონ. ჯერჯერობით, არ ჩანს, მაგრამ ჯანდაცვის სამინისტროს ვებგვერდზეც გამოჩნდება, დამოუკიდებლადაც შეეძლებათ აღნიშნული ვებგვერდის გახსნა - ambulatoria@moh.gov.ge ერქმევა" - ნათქვამია განცხადებაში.