აზერბაიჯანის პრეზიდენტი, ილჰამ ალიევი აცხადებს, რომ იმ ცეცხლის შეწყვეტის შეთანხმებაში, რომელიც გაფორმდა აზერბაიჯანს, სომხეთსა და რუსეთს შორის, მთიანი ყარაბაღის სტატუსთან დაკავშირებით არც ერთი სიტყვა არ წერია, რაც ნიშნავს იმას, რომ ოფიციალური ბაქო მთიან ყარაბაღს მხოლოდ თავის ტერიტორიად აღიქვამს.

„მინდა ერთი საკითხის შესახებ მოგაწოდოთ ინფორმაცია ჩემო ხალხო, შეამჩნიეთ ალბათ, რომ ხელმოწერილ შეთანხმებაში მთიანი ყარაბაღის სტატუსთან მიმართებით არაფერია განსაზღვრული, სად არის სომხური მხარის მოთხოვნები მისთვის დამოუკიდებლობის მინიჭებასთან დაკავშირებით? . როდესაც მე მათ ავტონომია შევთვაზე, არ დამთანხმდნენ და განაცხადეს, რომ მთიანი ყარაბაღი არის დამოუკიდებელი სახელმწიფო, აზერბაიჯანისგან დამოუკიდებელი პოლიტიკური გაერთიანება. რა მოხდა? რა მოხდა ფაშინიან? რა მოუვიდა სტატუსს? ის დასამარდა, გაუჩინარდა, წავიდა და არც არასდროს იქნება, ვიდრე მე პრეზიდენტი ვარ“.

ილჰამ ალიევმა ვლადიმერ პუტინთან ვიდეო კონფერენციის ფორმატში გამართულ შეხვედრაზე კონფლიქტის დარეგულირებაში შეტანილი წვლილისთვის მადლობა გადაუხადა და აღნიშნა, რომ ეს არის ისტორიული დღე-მრავალწლიანი ოკუპაციისგან გათავისუფლების დღე.