უკრაინის ხელისუფლების გადაწყვეტილება ევროკავშირთან ასოცირებაში პაუზის შესახებ, გამოიწვევს ქვეყნიდან ინვესტიციების მასიურ გადინებას  და მხოლოდ დაამძიმებს მის ფინანსურ პრობლემებს, თვლის შვედეთის საგარეო საქმეთა მინისტრი კარლ ბილდტი.

„ზუსტად შემიძლია ვთქვა, რომ პოლიტიკა, რომელსაც უკრაინის ხელისუფლება საჯაროდ ახორციელებს, ეს პოლიტიკა არალოგიკურია. შემიძლია მხოლოდ ერთი დავამატო, მზად ვარ სანაძლეო დავდო, რომ კაპიტალის გადინება უკრაინიდან უფრო მეტი იქნება, ვიდრე ნებისმიერი ფინანსური დახმარება რუსეთის ფედერაციის მხრიდან“, - განაცხადა მინისტრმა სამოქალაქო საზოგადოების კონფერენციაზე ვილნიუსში.

ბილდტმა დასძინა, რომ არავინ ჩადებს მილიონებს „შავ ხვრელში“. „ამიტომ იმ ქვეყნის ეკონომიკური პოლიტიკა, რომელშიც საერთაშორისო სავალუტო ფონდი ინვესტირებას ახდენს, უნდა იყოს გამჭვირვალე და სტაბილური. უნდა არსებობდე ნდობა რომ ჩადებული ფული არ დაიკარგება“, - აღნიშნა კარლ ბილდტმა.

მისი თქმით, სწორედ ასოცირების შეთანხმებაზე ხელმოწერა გამოიწვევდა ინვესტიციების მოზიდვას. „მაგრამ ჩვენ პასუხად გვესმის: კი, ჩვენ ფული გვჭირდება, მაგრამ არ გვინდა თავისუფალი ვაჭრობის ზონაზე შეთანხმება და ეს ქვეყანას ძალიან დაუცველ მდგომარეობაში აგდებს. იცის ამის შესახებ იანუკოვიჩმა? ასეთ არჩევანს შეგნებულად აკეთებს? შესაძლოა. შეიძლება, ის ამას შეუგნებლად აკეთებს“, - თქვა ბილდტმა.