26 წლის შემდეგ პირველად, მთიან ყარაბაღში სიტუაცია კარდინალურად იცვლება- იმ ფონზე, რომ აზერბაიჯანის არმიამ 45 დღის განმავლობაში უშუალოდ საბრძოლო მოქმედებათა მიმდინარეობისას ტრიუმფალურ წარმატებებს მიაღწია, სომხეთის პრემიერ-მინისტრმა ნიკოლ ფაშინიანმა ე.წ კაპიტულაციაზე თანხმობა განაცხადა. ამის შესახებ მთავრობის მეთაურმა საკუთარ გვერდზე განაცხადა:

„ხელი მოვაწერე დოკუმენტს, რომლის ტექსტიც ძალზე მტკივნეულია ჩემთვის და ჩემი ხალხისთვის. გადაწყვეტილება მივიღე სამხედრო სიტუაციის ღრმა ანალიზისა და გამოცდილი ადამიანების მიერ გაცემული რჩევების საფუძველზე. ეს არ გახლავთ გამარჯვება, მაგრამ ეს არც დამარცხებაა. ჩვენ უნდა შევიცნოთ საკუთარი თავი. ეს უნდა იყოს ეროვნული ერთიანობის, აღორძინების დასაწყისი. უნდა გავიაზროთ სომეხი ერის დამოუკიდებლობა და არ დავუშვათ წარსულის შეცდომების გამეორება. მუხლს ვიდრეკ სამშობლოსთვის დაღუპული ჯარისკაცების წინაშე, თაყვანს ვცემ ჩვენს სამხედროებს, გენერლებს, მოხალისეებს, რომლებიც საკუთარი სიცოცხლის ფასად იცავდნენ სამშობლოს“- განაცხადა ფაშინიანმა

გავრცელებული ინფორმაციით, სომხეთის პრემიერ-მინისტრი თანახმაა შეიარაღებული ძალები გაიყვანოს აგდემის, კელაბჯარისა და ლაჩინის რაიონებიდან, სადაც დადგება, როგორც აზერბაიჯანის შეიარაღებული ძალები, ასევე რუსი მშვიდობისმყოფელები, რომლებიც დაიცავენ აღნიშნულ ტერიტორიაზე უსაფრთხოებას.