დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ, მთავრობის ადმინისტრაციაში გამართულ ბრიფინგზე განაცხადა, რომ ბოლო 24 საათში საქართველოში კორონავირუსის ახალი დადასტურებული შემთხვევების 74% სიმპტომიანია.

მისი თქმით, საქართველოში ეპიდსიტუაცია რთულდება.

„დღეს, 10 - თვიანი ისტორიის განმავლობაში ინფიცირების ყველაზე მაღალი რიცხვი გვაქვს. ყველაზე მეტი შემთხვევა - 1044 გამოვლინდა თბილისში, აჭარას იმერეთმა გადაასწრო და გვაქვს 526, აჭარაში - 503, ქვემო ქართლში - 207, შიდა ქართლში - 177, გურიაში - 89, სამეგრელო - ზემო სვანეთში - 117, კახეთში - 36, მცხეთა-მთიანეთში - 43, სამცხე-ჯავახეთში - 25, რაჭა-ლეჩხუმსა და ქვემო სვანეთში - 8.

ახალი დადასტურებული შემთხვევებიდან 74%, ანუ 2056 სიმპტომიანი გახლავთ. ერთი მხრივ კარგია, რომ სიმპტომიანი პაციენტები აქტიურად მიდიან სამედიცინო დაწესებულებებში გამოსავლენად, რადგან დროულად ხდება გამოვლენა და იზოლირება“,-აღნიშნა გამყრელიძემ.