ყარაბაღში საბრძოლო მოქმედებები ისევ აქტიურად გრძელდება. მიუხედავად ცეცხლის შეწყვეტის ე.წ შეთანხმებისა დაპირისპირებულ მხარეთა სამხედროები არ წყვეტენ შეტაკებებს ერთმანეთის პოზიციებზე. უკანასკნელი დღეების განმავლობაში განსაკუთრებული წინსვლა შეინიშნება ფრონტზე აზერბაიჯანელთა არმიის მხრიდან. გავრცელებული ინფორმაციით, აზერბაიჯანის ჯარმა მთლიანად გადაკეტა ყარაბაღის ირანთან გასასვლელი სამხრეთი საზღვარი და მას ახლა სრულად არმია აკონტროლებს.

აზერბაიჯანის თავდაცვის სამინისტრო აქვეყნებს ვიდეოს, რომელიც გადაღებულია ზენგილანის რაიონში, აგბანდის დასახლებაში. კადრებში ისმის მიმართვა უმაღლესი მთავარსარდლის, ილჰამ ალიევისადმი, რომელსაც აუწყებენ აღნიშნული დასახლებული პუნქტის აზერბაიჯანული არმიის მიერ დაკავების შესახებ.

აზერბაიჯანულმა სამხედრო პორტალებმა აგრეთვე გამოაქვეყნეს ტყვედ აყვანილი სომეხი ჯარისკაცების ვიდეოც, რომლებსაც აიძულებენ თქვან, რომ ყარაბაღი აზერბაიჯანული ტერიტორიაა.

ოფიციალურმა ბაქომ დაადასტურა აგრეთვე ის ფაქტი, რომ აზერბაიჯანული არმია შეტევაზე გადავიდა და ლაჩინის რაიონს, რომელიც სომხეთიდან მომარაგების მთავარი მაგისტრალია ყარაბაღისთვის, მიუახლოვდა 15 კილომეტრზე. რუსი და დასავლელი სამხედრო ექსპერტები აღნიშნავენ, რომ იმ შემთხვევაში თუ ლაჩინის ე.წ დერეფანს აზერბაიჯანი გადაკეტავს, ეს იქნება სომხეთისთვის ომის წაგების ტოლფასი.

აზერბაიჯანულმა მხარემ გამოაქვეყნა აგრეთვე ვიდეოები, რომელიც ასახავს ქუბადლის რაიონში საარტილერიო და საავიაციო იერიშების შედეგად დახოცილ სომეხ ჯარისკაცებს. კადრებში ჩანან გარდაცვლილი სამხედროები. ოფიციალურად სომხური მხარე, იუწყება 927 გარდაცვლილი ჯარისკაცის შესახებ.

ორი დღის განმავლობაში წარმატებული სამხედრო იერიშის ამსახველ და გამოქვენყებულ მასალებს შორისაა აგრეთვე სომხური სამხედრო ტექნიკისა და საარტილერიო პოზიციების განადგურების კადრები უპილოტო საფრენი აპარატებიდან.