მიუხედავად, ჰუმანიტარული მიზნით ყარაბაღში ამოქმედებული ცეცხლის შეწყვეტის შეთანხმებისა, სომხეთსა და აზერბაიჯანს შორის შეიარაღებული დაპირისპირება გრძელდება. ორივე მხარე იტყობინება საარტილერიო და სარაკეტო დაბომბვების შესახებ.

აზერბაიჯანის პრეზიდენტი, ილჰამ ალიევი იტყობინება, რომ სამხრეთის მიმართულებით, ჯებრაილის რაიონში არსებული სოფლები- სოლტანლი, ამირვარლი, მაშანლი, ჰასანლი, ალიკეიხანლი, გუმლაგი, ჰაგილი, გოირჩენვეისალი, ნიაზგულარი, კეჩელი და ა.შ გათავისუფლდა სომხური არმიის დანაყოფების კონტროლისგან.

აზერბაიჯანის საგარეო საქმეთა მინისტრის პრესსპიკერის განცხადებით, ზემოხსენებული ცეცხლის შეწყვეტის შეთანხმება მუდმივი არ გახლავთ, და ეს არ გულისხმობს იმას, რომ აზერბაიჯანი უახლოეს დღეებში არ განაახლებს დაკარგული ტერიტორიების დაბრუნებას. მისი განცხადებით, ოფიციალური ბაქოს მიზანი მთიან ყარაბაღზე სრული კონტროლის აღებაა.

გასული 24 საათის განმავლობაში აზერბაიჯანელებმა ჯებრაილის რაიონის გასწვრივ ირანის საზღვართან მთელი რიგი ტერიტორიების დაკავება მოახერხეს- მათ ხუდაფერინის ხიდზე, რომელიც უშუალოდ ესაზღვრება მეზობელ სახელმწიფოს აზერბაიჯანის ეროვნული დროშა აღმართეს.

შეგახსენებთ, რომ ყარაბაღის სამხრეთში სომეხთა თავდაცვითი პოზიციები სრულად ჩამოიშალა, აზერბაიჯანული სამხედრო ნაწილები მდინარე არაქსისა და მთიანეთს შორის არსებულ ტერიტორიას იკავებენ. აზერბაიჯანელ ექსპერტთა ვარაუდით, უახლოეს დღეებში სავარაუდოა ლაჩინის რაიონში გაიმართოს მასშტაბური შეტაკებები, საიდანაც ყარაბაღში არსებული სომხური საარმიო ნაწილების შეიარაღბითა და ამუნიციით მომარაგება ხდება.