„როგორც ჩანს, უახლოეს დღეებში ჩვენ ათასიან ნიშნულს გადავაბიჯებთ და ჩვენი გეგმის მთავარი კომპონენტია, მინიმალური ზიანი მიადგეს ჩვენი მოქალაქეების ჯანმრთელობასა და ქვეყნის ეკონომიკას. მისი განვითარება და აღდგენა ერთ-ერთი მთავარი გეგმაა, რომელიც დღის წესრიგში დგას. მიუხედავად გლობალური გამოწვევისა, ეკონომიკური კონკურენცია პოსტკრიზისულ ვითარებაში იქნება აბსოლუტურად სხვა და ჩვენი მთავარი მიზანია, ამ კრიზისიდან გამოვიდეთ ისე, რომ ზიანი იყოს მინიმალური. ამიტომ, ჩვენი ძირითადი სტრატეგია ამ მიმართულებით გახლავთ წერტილოვანი შეზღუდვები.

მოგეხსენებათ, ჩვენ ვიბრძვით ორ ფრონტზე, ვითვალისწინებთ რა ჩვენი მოქალაქეების ინტერესებს და ვცდილობთ, თავიდან ავიცილოთ მძლავრი ეკონომიკური კრიზისი. მეორე ტალღის დაწყებამდე გარკვეული შედეგები გვაქვს - მოგეხსენებათ, რომ ქვეყანაში ეკონომიკური ვარდნა შემცირდა 16-დან დაახლოებით 5,5%-მდე. გარდა ამისა, აუცილებლად უნდა აღვნიშნოთ, რომ მცირედი გაუმჯობესება გვაქვს, რაც არ უნდა გასაკვირი იყოს, უცხოურ ინვესტიციებში და ასევე სერიოზული გაუმჯობესება გავქს ექსპორტში (სექტემბრის მონაცემებით, წინა წელთან შედარებით 8%-ისთ არის გაზრდილი). ეს ყოველივე არის იმის საფუძველი, რომ ქვეყანამ შეინარჩუნოს პოზიტიური რეიტინგები იმისთვის, რომ პოსტ-კრიზისული ეკონომიკური აღდგენის პერიოდში ჰქონდეს ის კონკურენტული უპირატესობა, რაც მოგვცემს შესაძლებლობას, სწრაფად აღვადგინოთ სამუშაო ადგილები. საერთაშორისო სავალუტო ფონდის მიხედვით, საქართველოს 2021 წელს ეკონომიკური ზრდის საპროგნოზო მაჩვენებელი ექნება 5%, ხოლო 2021-2025 წლებში 5,5%. ეს მხოლოდ საპროგნოზო ციფრებია და ჩვენ თუ სწორად ვმართავთ ვირუსს და ჩვენს ეკონომიკურ პროცესებს, შესაძლებლობა გვექნება ეს მაჩვენებლები კიდევ უფრო გავაუმჯობესოთ“ - განაცხადა გახარიამ.