ყარაბაღში სომხურ და აზერბაიჯანულ მხარეს შორის სამხედრო შეიარაღებული დაპირისპირება ისევ მწვავედ მიმდინარეობს. რუსეთში გაფორმებული ცეცხლის შეწყვეტის შეთანხმება ამ დრომდე არ მოქმედებს- ექსპერტთა ვარაუდით, არც ერთი მხარე არ აპირებს იქამდე გაჩერებას, სანამ მათთვის სასურველი რეალობა არ შეიქმნება ფრონტის ველზე. აზერბაიჯანული არმია მუროვდაგის ქედიდან დაშვებას და მ11-ის ტრასის გადაკეტვას ცდილობს.

ბრძოლები აქტიურია აგრეთვე ჰადრუტის მიდამოებშიც- თუ აზერბაიჯანი ქალაქ ჰადრუტს დაიკავებს, ამის შემდეგ არმიას გზა ეხსნება ქალაქ ფიზულის მიმართულებით, საიდანაც მარტივად შეუტევენ სტეფანაკერტის ზონას.

აზერბაიჯანული სამხედრო პორტალებმა გამოაქვეყნეს ვიდეო კადრები, სადაც ასახულია თუ როგორ ბომბავს საჰაერო დამრტყმელი დრონი სომხური არმიის პოზიციებს. აღნიშნულ ვიდეოში ჩანს სომეხ მებრძოლთა შეკრება ერთ-ერთ ლოკაციაზე, სადაც უპილოტო საფრენმა აპარატმა განახორციელა ავიაიერიში. აზერბაიჯანელთა თქმით დაბომბვის შედეგად 10-ზე მეტი ჯარისკაცი ადგილზე გარდაიცვალა.

აგრეთვე გამოქვეყნდა მეორე ვიდეოც, სადაც ასახულია ღამის მოქმედებები- თხრილში მყოფ სომეხ მებრძოლებს უპილოტო კამიკაძე საფრენი აპარატი ბომბავს. აზერბაიჯანელთა განცხადებით, ორივე ვიდეოკადრი ჰადრუტის მიმართულებით შეტევის ეპიზოდებს ასახავს.