ყარაბაღში გასული ღამის განმავლობაში ფრონტის მთელ ხაზზე სასტიკი შეტაკებები მიმდინარეობდა სომხურ და აზერბაიჯანულ შეიარაღებულ ძალებს შორის. აქტიურად იბომბებოდა ქალაქი სტეფანაკერტის ცენტრალური ნაწილი.

აზერბაიჯანის თავდაცვის სამინისტროს ინფორმაციით, მისმა საარმიო დანაყოფებმა საარტილერიო იერიში მიიტანეს სომეხთა პოზიციებზე სხვადასხვა მიმართულებით. სამხედრო უწყების ოფიციალურ განცხადებაში აღნიშულია, რომ საარტილერიო და საჰაერო იერიშების შედეგად აზერბაიჯანის არმიამ სომეხთა მე-5 სამთო პოლკი შტაბი გაანადგურა, რომელშიც 10-ე დივიზიის მეთაური, პოლკოვნიკი სამველ გრიგორიანი იმყოფებოდა- იგი მძიმედ დაიჭრა, ხოლო საარტილერიო პოლკის პოლკოვნილ-ლეიტენანტი არმან დერმეიანი და სხვა ჯარისკაცები დაბომბვის შედეგად დაიღუპნენ.

აღნიშული იერიშის ვიდეო ფაქტს აქვეყნებს აზერბაიჯანის თავდაცვის სამინისტრო. გამოქვეყნდა აგრეთვე კადრები, სადაც ასახულია სომხური ტანკების შენიღბული პოზიციები, თუმცა მათი ადგილსამყოფელი მაინც ადვილი ამოსაცნობი იქნა აზერბაიჯანული მხარისთვის, რომელმაც საავიაციო ბომბით გაანადგურა აღნიშნული ტექნიკა. თავდაცვის უწყებამ აგრეთვე გამოაშკარავა ჯებრაილის რაიონის დამადასტურებელი ფაქტი- ვიდეოში ასახულია სომხური წარწერა ადმინისტრაციულ ცენტრში, სადაც ჯარისკაცებმა აღმართეს აზერბაიჯანული დროშები.

სომხეთის თავდაცვის სამინისტრო თავის მხრივ იუწყება აზერბაიჯანელთა რამდენიმე კოლონის განადგურების შესახებ. ე.წ არცახის თვითგამოცხადებულმა პრეზიდენტმა აღნიშნა, რომ აზერბაიჯანელები მიზანმიმართლად ავრცელებენ დეზინფორმაციას სომეხთა რიგებში ქაოსის გამოსაწვევად. მისი თქმით, ამ დრომდე წარმატებით მიმდინარეობს ყველა იერიშის მოგერიება ფრონტის მთელ ხაზზე.