ყარაბაღში აზერბაიჯანელებმა სამხრეთის ფრონტის მიმართულებაზე სომხური არმიის პოზიციები ძლიერ შეარყიეს და თავდაცვითი ზღუდეები გაარღვიეს. ამის შესახებ ქვეყნის თავდაცვის სამინისტრო იუწყება. უწყების მიერ გავრცელებულ ვიდეოებში ჩანს სტრატეგიული დასახლებული პუნქტის ჯებრაილის აღების კადრებიც. აზერბაიჯანული არმია შევიდა ჯებრაილში არსებულ სომხურ ბაზაზე და მიტოვებულ სამხედრო ტექნიკას, საბრძოლო მასალებსა და შეიარაღებას დაეუფლა.

ჯებრაილის მიმართულებაზე აგრეთვე ჩასაფრება მოუწყვეს სომხურ სამხედრო კოლონას, რომელსაც გადაჰქონდა წინა ხაზზე შეიარაღება და საბრძოლო მასალათა კომპლექტი არმიისთვის. კადრებში ჩანს რამდენიმე ათეული სამხედრო სატრანსპორტო საშუალება, რომელთაგან რამდენიმე მათგანი იწვის. გავრცელებული ინფორმაციით, აზერბაიჯანელმა სპეცრაზმელებმაჩასაფრება მოუწყვეს კოლონის წინა რიგებში მყოფ მანქანებს, რომელთა ფონზეც პირადი შემადგენლობის დიდი ნაწილი შემთხვევის ადგილიდან გაიქცა.

სამხედრო უწყებამ აგრეთვე გაავრცელა ვიდეოკადრები, სადაც ასახულია ჯებრაილიდან ჩრდილოეთის მიმართულებით, ფიზულის რაიონში არსებულ სოფელ ჰორადიზთან მომხდარი ბრძოლების შედეგად ნაალაფარი ტექნიკა. კადრებში ნაჩვენებია განადგურებული 2 ტანკი, ქვეითთა საბრძოლო მანქანა და აგრეთვე პოზიციებზე მიტოვებული, ნაალაფარი 5 ტ-72 ის ტიპის სომხური არმიის ტანკი.

აზერბაიჯანის თავდაცვის სამინისტროს ოფიციალური გვერდი აგრეთვე აქვეყნებს მარტაკერტში არსებული სომეხთა სამხედრო ბაზის არტილერიიდან დაბომბვის მომენტებს. კადრებში მოცემულია ფაქტი, თუ როგორ ზვერავს ჰაერიდან უპილოტო საფრენი აპარატი, რომელიც სარაკეტო საარტილერიო დანადგარებს აწვდის ზუსტდ კოორდინატებს, რომლებიც მასირებულად ბომბავენ სომხურ სამხედრო ინფრასტრუქტურას. სამინისტროს ცნობით, დაბომბვის შედეგად განადგურებულია საბრძოლო მასალის საწყობი, სამხედრო ბაზის ბარაკები და სხვადასხვა ნაგებობები.