ყარაბაღში შეიარაღებული დაპირისპირება 1994 წლის შემდეგ ყველაზე სისხლისმღვრელ ფაზაში გადავიდა. ორივე მხარე ერთმანეთის პოზიციებს აქტიურად ბომბავს საარტილერიო სისტემებიდან.

სოციალურ მედიაში ვრცელდება სტეფანაკერდის საავადმყოფოში არსებული უმძიმესი მდგომარეობის ამსახველი კადრები, სადაც ჩანს საავიაციო და საარტილერიო დაბომბვების შედეგად დაშავებული, უმძიმეს მდგომარეობაში მყოფი სამხედრო პოლიციის თანამშრომლები. კადრებში ნაჩვენებია როგორც დაჭრილი, აგრეთვე დაღუპული ადამიანები. იმის გამო, სამედიცინო პუნქტს საკმარისი რაოდენობით არ გააჩნია საწოლები, მძიმედ დაჭრილი სამხედროები მოსაცდელში უცდიან თავიანთ რიგს, თუ როდის გაუწევენ პირველად სამედიცინო დახმარებას.

დღეს დილით გავრცელდა ვიდეო, თუ როგორ იბომბება არაღიარებული ყარაბაღის ე.წ დედაქალაქი სტეფანაკერტი. ადგილობრივი მედიისა და სამხედრო ექსპერტთა შეფასებით, ვიდეოს პირველ ეპიზოდში ისმის პილოტირებადი ავიაციის ძრავის ხმა, რომლის შემდეგაც მასშტაბურად იბობმება სხვადასხვა ლოკაციებზე არსებული ობიექტები. გავრცელებული ინფორმაციით, სტეფანაკერტში არსებული სამხედრო ნაწილი ავიაციამ დღეს დილით რამდენჯერმე დაბომბა.

სოციალურ მედიაში ვრცელდება აგრეთვე რუსი ჟურნალისტების მიერ გადაღებული ვიდეოკადრები, სადაც ისინი საუბრობენ სტეფანაკერტის ინტენსიურ დაბომბვაზე. მათი თქმით, იქიდან გამომდინარე თუ რა ინტენსივობით იბომბებოდა ქალაქი, ქალაქში მათი დარჩენა ვეღარ იქნებოდა უსაფრთხო, რის გამოც გაემგზავრნენ აღნიშნული საომარი ზონიდან.