სომხეთსა და აზერბაიჯანს შორის შეიარაღებული დაპირისპირება აქტიურ ფაზაშია და ყოველდღიურად მწვავდება. გასული დღისა და ღამის განმავლობაში აზერბაიჯანელმა სამხედროებმა ე.წ მთიანი ყარაბაღის თავდაცვის შეიარაღებული ზღუდეები და პოზიციები სამხრეთის მიმართულებაზე გაარღვიეს და მნიშვნელოვნად წაიწიეს წინ. ამის შესახებ ილჰამ ალიევმა თავის გამოსვლაშიც ისაუბრა.

პრეზიდენტის თქმით, ქალაქი ჯაბრაილის გათავისუფლებასთან ერთად კონტროლი დამყარებულია ისეთ დასახლებულ პუნქტებსა და სოფლებზე, როგორებიცაა: კარხულუ, შუკურბეილი, ჩერეხანი, დაშკასანი, ჰოროვლუ, მაჰმადლუ, ჯაფარაბადი, იუხარი მარალიანი და სხვა...

გასული ღამის განმავლობაში სომხურმა სარაკეტო არტილერიამ იერიში მიიტანა აგრეთვე აფშერონის ნახევარკუნძულზე, ბაქოს გარეუბანსა და აგრეთვე მინგეჩაურის წყალსაცავის ტერიტორიაზე. ექსპერტთა აზრით, აღნიშული ქმედება მიზნად ისახავს იმ მოცემულობას, რომ აზერბაიჯანმა ზემოხსენებულ სარაკეტო დარტყმას ანალოგიურად უპასუხოს სომხეთის ტერიტორიაზე, რომლითაც კოლექტიური უსაფრთხოების ხელშეკრულების ორგანიზაციის (ოდკბ) წევრ რუსეთს დაავალდებულებს შეთანხმების პირობების უზრუნველყოფას და სომხეთის აგრესორისგან დაცვას.

აზერბაიჯანის თავდაცვის სამინისტროს ოფიციალური გვერდი აქვეყნებს ვიდეოკადრებს, სადაც ასახულია სომეხ მებრძოლთა კონტროლირებადი პოზიციების დაკავება. აღნიშნულ კადრებში აგრეთვე ჩანს ნაალაფარი სამხედრო ტექნიკა და შეიარაღება.