ინფექციური საავადმყოფოს სამედიცინო დირექტორის ინფორმაციით, ბათუმის რესპუბლიკურ საავადმყოფოში კორონავირუსით ინფიცირებული 141 პაციენტიდან 80%-ზე მეტის მდგომარეობა მძიმეა. მარინა ეზუგბაიას თქმით, ამ დროისთვის, საავადმყოფოში კრიტიკულ მდგომარეობაში მყოფი 9 პაციენტი რჩება.

"სამომავლოდ განიხილება, ბათუმის რესპუბლიკური საავადმყოფო გახდეს Covid 19-ის ძირითადი მიმღები მძიმე და კრიტიკულ პაციენტების მიმართებით. დღეს ვნახე 141 პაციენტი, რომელთა 80%-ზე მეტის მდგომარეობა ნამდვილად მძიმეა, აქედან კრიტიკული პაციენტების რაოდენობა ცხრაა. საწოლფონდი არსებობს, მაგრამ ჩვენ არ ვიცით, როგორი იქნება დინამიკა და უნდა ვიყოთ მზად, რომ პაციენტების მატების შემთხვევაში, საწოლფონდი იყოს საკმარისი. რისკების დათვლით, ხარისხის დათვლით დროულად უნდა მოხდეს პაციენტების დიფერენცირება სასტუმრო-ჰოსპიტალებში გადაყვანაზე და კლინიკაში გადაყვანაზე, იქაც ისე უნდა ვმართოთ, რომ რისკები გავითვალისწინოთ, ხარისხი არ დავაგდოთ და პაციენტების დაყოვნება შევამციროთ", - თქვა ეზუგბაიამ.