უკრაინის დედაქალაქ კიევში მასობრივი აქციები არ წყდება. ადგილობრივი ინფორმაციით გუშინ გამართულ აქციაზე, მონაწილეები სამართალდამცველებს დაუპირისპირდნენ. მათივე ინფორმაციით, ინციდენტი მალევე ამოიწურა. აქციებია ასევე უკრაინის სხვადასხვა ქალაქებში. უკრაინელები უკმაყოფილებას ხელისუფლების გადაწყვეტილების გამო გამოხატავენ, რომელიც უკრაინის ევროკავშირთან ასოცირების ხელშეკრულების მზადების პროცესის შეჩერებას გულისხმობს. გავრცელებული ინფორმაციით, დემონსტრანტები გამოსვლების შეწყვეტას არ აპირებენ და კვირას, კიევში მასობრივი დემონსტრაციის გამართვას გეგმავენ. 

ამასთან, კიევში, მაიდანზე მობილიზებულია პოლიცია. თუმცა, აქციები მშვიდ ვითარებაში მიმდინარეობს.

უკრაინის ხელისუფლების განცხადებით, ევროკავშირთან ასოცირების ხელშეკრულების მზადების პროცესის შეჩერება, ქვეყნის ნაციონალური უსაფრთხოებისა და ეკონომიკური ინტერესებიდან გამომდინარე მოხდა.