დაავადებათა კონტროლის ცენტრის ხელმძღვანელის მოადგილე პაატა იმნაძე საზოგადოებას რეკომენდაციების დაცვისკენ მოუწოდებს, რათა ინფექცია უმართავი არ გახდეს.

მისივე თქმით, იმ შემთხვევაში, თუ მოქალაქეები ეპიდემიოლოგების რეკომენდაციებს არ გაითვალისწინებენ, ბევრი ადამიანი დაინფიცირდება და, შესაბამისად, ბევრიც დაიღუპება.

„კიდევ ერთხელ მინდა მივმართო მოქალაქეებს, გვინდა კიდევ შეზღუდვების გარეშე ვიყოთ? მხოლოდ პირბადე ვატაროთ და დისტანცია დავიცვათ. კლინიკებში ადგილები არის, თუ საჭირო გახდა საწოლფონდი 5 ათასამდე გაიზრდება, უბრალოდ არ გვინდა ეს მოხდეს. არ გვინდა ბევრი ინფიცირებული იყოს, რადგან რაც უფრო მეტი დაავადდება, მეტი ჩვენი თანამოქალაქე დაიღუპება, რომელიც ისე არ დაიღუპებოდა. ეს უნდა გავითავისოთ. თუ დაინფიცირდება ასი ათასი კაცი, იქიდან ერთი პროცენტი უკვე ბევრია. არ გვინდა ათასი კაცი გარდაიცვალოს ამ „კოვიდით“. თუ ბევრი გახდება ავად, ბევრი მოკვდება, თორემ ბევრი უპრობლემოთაც გადაიტანს. გავწიროთ ჩვენი ხანშიშესული თაობა და ჩვენი თანამოქალაქეები, რომლებსაც ქრონიკული დაავადებები აქვთ?!, – განაცხადა იმნაძემ „იმედის“ ეთერში.