თბილისში, გამრეკელის ქუჩაზე მდებარე „მედკაპიტალის“ პოლიკლინიკაში მედიკოსს კორონავირუსი დაუდასტურდა.

„მედკაპიტალის“ გენერალური დირექტორის მოადგილის, მაია აბულაძის განცხადებით ინფიცირებულ ექიმს ბათუმში მოგზაურობის ისტორია აქვს და ვირუსი მანამდე მისი ოჯახის წევრს დაუდასტურდა, რის შემდეგაც ტესტი მედიკოსსაც გაუკეთდა და ინფექცია მასაც აღმოაჩნდა.

მისივე ინფორმაციით, ინფიცირებულ ექიმს არანაირი სიმპტომები არ ჰქონია, ის ბოლოს სამსახურში ოთხშაბათს იმყოფებოდა, ვირუსი კი შაბათს დაუდასტურდა. აბულაძის განცხადებით, ინფიცირებულის კოლეგები, სულ 19 ადამიანი, რომლებსაც შეხება ჰქონდათ დაავადებულთან, თვიზოლაციასა და საკარანტინო სივრცეში იმყოფებიან და ამ ეტაპზე ვირუსი არც ერთს არ აქვს დადასტურებული.