ოქსფორდის უნივერსიტეტის და ფარმაცეფტული კომპანია ASTRAZENECA-ს მიერ დამზადებული კორონავირუსის ვაქცინის კლინიკური გამოცდები შეჩერდა, რისი მიზეზიც გახდა ის, რომ ერთ-ერთი მონაწილე საექსპერიმენტო ცდების განმავლობაში ცუდად გახდა.

ბრიტანული მედიის ინფორმაციით, ზემოხსენებულმა ვაქცინამ ცდების პირველი და მეორე ეტაპი წარმატებით გაიარა, რაც დიდ იმედებს იძლეოდა, რომ იგი მალე ფართო მასებისთვის იქნებოდა ხელმისაწვდომი და იქნებოდა დაშვებული ფართო სამედიცინო მოხმარებაში.

კომპანია ASTRAZENECA-ს განცხადებით, აღნიშნული მოვლენა საგანგაშო არაა- მათი თქმით, ეს არის ცდების ე.წ დაპაუზების შემთხვევა, რომლის გამომწვევი მიზეზიც ამ დრომდე არაა დადგენილი.

შეგახსენებთ, რომ ჯანდაცვის მსოფლიო ორგანიზაცია და სხვადასხვა ქვეყნის სამედიცინო უწყებები ოქსფორდის უნივერსიტეტისა და კომპანია ASTRAZENECA-ს მიერ შექმნილ ვაქცინას ერთ-ერთ სერიოზულ სანდრო პრეპარატად განიხილავენ, რომელმაც კოვიდ 19 საბოლოოდ უნდა დაამარცხოს. ვაქცინის ცდებში სულ 30 000-მდე მონაწილეა ჩართული. საექპერიმენტო გამოცდები აქტიურად მიმდინარეობს დიდ ბრიტანეთში, აშშ-ში, ბრაზილიასა და სამხრეთ აფრიკაშიც.

ჯანმოს განცხადებით, მთელ მსოფლიოში ამ დროისთვის კოვიდ 19-ის საწინააღმდეგო 180-მდე ვაქცინაზე მიმდინარეობს მუშაობა. შეგახსენებთ, რომ მსოფლიოში კოვიდ 19-ის ვირუსს უკვე 901 934 ადამიანი შეეწირა, ხოლო 27 მილიონი ინფიცირებულიდან 19-მა უკვე დაამარცხა ინფექცია.