ბრიტანულ მედიაში ვრცელდება სენსაციური კადრები, სადაც ასახულია სკოლის მოსწავლე გოგონა, რომელიც ონლაინ გაკვეთილებს ZOOM-ის პროგრამით ერთვება, ამ დროს კი ნიღბიანი მძარცველები შემოდიან მის სახლში. აღნიშული შემთხვევა ეკვადორში მოხდა. პირდაპირ ეთერში გაკვეთილს ესწრებოდა 25 მოსწავლე და მასწავლებელი.

როგორც ირკვევა, მძარცველებმა არ იცოდნენ, რომ ისინი პირდაპირ ეთერში მოხვდნენ თავდასხმის დროს. ვიდეოკადრებზე დაფიქსირებული შემთხვევის ფონზე ძარცვის შესახებ გოგონას თანაკლასელებმა სამართალდამცავ უწყებებსა და მსხვერპლის ოჯახის წევრებს შეატყობინეს. პოლიციელებმა დანაშაულის ადგილიდან გაქცეული 4 ეჭვმიტანილი მალევე დააპატიმრეს.

ბრიტანული მედიის მიერ გავრცელებულ კადრებში ჩანს ZOOM-ის ონლაინ გაკვეთილის დროს გოგონას რეაქცია, როდესაც ნიღბიანი მამაკაცები მას სიმშვიდისკენ მოუწოდებენ.

ერთ-ერთმა მძარცველმა ონლაინ კონფერენციაში ჩართული ლეფტოპიც დახურა და სხვა ძვირფასეულობასთან ერთად ისიც მოიპარა.

დამნაშავეთა პოვნა პოლიციას გაუმარტივდა მოპარული ტელეფონითა და ლეფტოპით, რომლებიც ნივთების ადგილმდებარეობას ავტომატურად აფიქსირებდნენ.