ინფექციური საავადმყოფოს დირექტორი თენგიზ ცერცვაძე აცხადებს, რომ საქართველოში კორონავირუსთან დაკავშირებით საპანიკოს ვერაფერს ხედავს.

მისი თქმით, ინფექციის ფართო გავრცელების არავითარი საფრთხე არ არის.

„ის შედეგები, რაც დღეს გვაქვს, მიუთითებს არა იმაზე, რომ საქმე ცუდად არის და ქვეყნის ექიმები და ხელმძღვანელობა ვერ უმკლავდება პროცესს, პირიქით, მიუთითებს იმაზე, რომ საქართველო აგრძელებს წარმატებულად გაუმკლავდეს კოვიდ-19-ს. ახლა ყველაზე ინტენსიური შიდა მიმოსვლის პერიოდია, ვისაც უნდოდა დასვენება, ყველამ დაისვენა დაბრკოლებების გარეშე. ეს ყველაფერი მიუთითებს არსებული სისტემის მდგრადობაზე. მე საპანიკოს ვერაფერს ვხედავ, უბრალოდ, ზედმეტად თავდაჯერებულები ნუ ვიქნებით და გვახსოვდეს, რომ საფრთხე არსებობს მთელ მსოფლიოში, ნაკლებად, მაგრამ არსებობს საქართველოშიც.

ყველა საფრთხე მოგვარებადია, მაგრამ იმის ჩათვლა, რომ ყველაფერმა ჩაიარა, უდიდეს საფრთხეს წარმოადგენს. რაც ჩვენმა ექიმებმა და ქვეყნის ხელმძღვანელობამ რეგულაციები დააწესა, ისინი უნდა შევასრულოთ. აუცილებელია პირბადის ტარება და სოციალური დისტანცირება, ასევე თავშეკავება ხალხმრავალი შეკრებებისგან, მერწმუნეთ, ეს მინიმალური მოთხოვნებია“, – განაცხადა თენგიზ ცერცვაძემ.