უკრაინის ხელისუფლება გააფრთხილეს, რომ თუ ვილნიუსში ასოცირების შესახებ შეთანხმებას არ მოეწერება ხელი, ბრიუსელსა და კიევს შორის ურთიერთობებში პაუზა, შესაძლოა, ძალიან დიდი ხნით გაიწელოს.

ევროპის კავშირის თავმჯდომარე ლიტვის პრეზიდენტმა, დალია გრიბაუსკატემ განაცხადა, რომ ევროკავშირი არ მოაწერს ხელს უკრაინის ასოცირების შესახებ შეთანხმებაზე, ექს-პრემიერ იულია ტიმოშენკოს საკითხის გადაწყვეტის გარეშე.

„არ არსებობს გარანტია, რომ შეთანხმებას ხელი ერთი, ან ორი წლის შემდეგ მაინც მოეწერება. ურთიერთობებში პაუზა, შესაძლოა, ძალიან დიდი ხნით გაიწელოს“, - აღნიშნა გრიბაუსკატემ.

უკრაინის საპარლამენტო ფრაქციების ხელმძღვანელთა საბჭოში შეთანხმდნენ, რომ ხუთშაბათს, რადას სხდომა დაიწყება იმ კანონპროექტების განხილვით, რომლებიც აუცილებელია ევროკავშირთან ასოცირების შესახებ ეთანხმებაზე ხელმოსაწერად - პროკურატურაზე, სახალხო დეპუტატების არჩევნებზე და პატიმართა საზღვარგარეთ მკურნალობაზე.

მასალა მომზადებულია უკრაინული მედიის ინფორმაციებზე დაყრდნობით.