ზურაბ ხიზანიშვილი თემურ ქეცბაიას დათხოვნას ითხოვს. ფეხბურთელის პროტესტი ქეცბაიას მიერ გაკეთებულმა განცხადებებმა გამოიწვია, სადაც მან საქართველოს ნაკრებზე ისაუბრა.

"ვეღარ მოვითმინე იმდენი ტყუილი, რაც თემურ ქეცბაიამ ჟურნალისტებთან შეხვედრისას ილაპარაკა. მერე რა, რომ მხოლოდ ამისულაშვილის გვარი ახსენა? ფაქტობრივად, ერთიანად "ჩაგვრეცხა" ყველა ფეხბურთელი. იმის თქმა, ნაკრები მეექვსე ადგილზე იყო დამარხული და მე ამოვთხარეო, არ არის ნაკრების ფეხბურთელების შეურაცხყოფა? მინდა, ფეხბურთის ფედერაცის ვთხოვო: თუ თემურ ქეცბაია თვითონ არ წავა, გაათავისუფლონ! ამას იმიტომ არ ვამბობ, რომ ეროვნულ გუნდში დაბრუნება მინდა. მიუხედავად იმისა, რომ ქეცბაიასგან წამოვედი და არა ნაკრებიდან! თუ მიმიწვევენ, ისევ ვითამაშებ", - განაცხადა ზურაბ ხიზანიშვილმა.

როგორც ხიზანიშვილი "კვირის პალიტრასთან" ინტერვიუში აღნიშნავს თემურ ქეცბაია ბუნებით ეჭვიანი ადამიანია და სულ ეჩვენება, რომ ყველა მის წინააღმდეგ არის განწყობილი. 

"თემური ერთხელ მაინც თუ დაინტერესდა, რატომ არ ჩამოდის ჯანო ანანიძე? ქეცბაიას ზოგიერთი ფეხბურთელი კი უთმენს გინებას, მაგრამ ყველა ხომ არ მოუთმენს? ანდა, რა გასაკვირია, ქართველმა კაცმა დედის გინება რომ არ მოითმინოს? როცა ფეხბურთელი იმაზე ფიქრობს, მომავალ ჩამოსვლაზე ქეცბაიამ დედა არ შემაგინოსო, როგორი განწყობით უნდა ითამაშოს", - განაცხადა ხიზანიშვილმა.

საქართველოს საფეხბურთო ნაკრებიდან ალექსანდრე ამისულაშვილი წავიდა. 31 წლის ფეხბურთელს თემურ ქეცბაიას გუნდში თამაში არ სურს.