რას წარმოადგენს ქიმიური ნივთიერება, რომლითაც ნავალნი მოწამლეს

მსოფლიო - 16:26, 25 Aug, 2020

2744

გერმანული კლინიკა "შარიტეს" ექიმების დასკვნით, ალექსეი ნავალნი ქიმიური ნივთიერებით მოწამლეს, რომელიც ქოლინესტერაზის ინჰიბიტორების ჯგუფს განეკუთვნება. ნავალნის მდგომარეობა სტაბილურად მძიმეა, ექიმებს პროგნოზების გაკეთება უჭირთ.

აღსანიშნავია, რომ რუსეთში, ომსკის საავადმყოფოში, სადაც ნავალნი იყო მოთავსებული ამ ნივთიერების შესახებ არაფერი უთქვამთ.

რას წარმოადგენს ქოლინესტერაზას ინჰიბიტორების ჯგუფი და როგორ მოქმედებს ის ადამიანის ორგანიზმზე

ეს ნივთიერებები მედიცინაში დემენციის სიმპტომების შემცირებისთვის გამოიყენება, მაგალითად ალცჰეიმერის დაავადების დროს.

^{(დემენცია - (dementia), სინდრომი, აღმოცენებული თავის ტვინის ქრონიკული ან პროგრესირებადი დაავადების შედეგად, რომელიც ხასიათდება უმაღლესი ქერქული ფუნქციების (მათ შორისაა: მეხსიერება, აზროვნება, ორიენტაცია, შემეცნება, არითმეტიკული უნარი, დასწავლის უნარი, მეტყველება და კრიტიკული ფუნქციები) უმრავლესობის დარღვევებით. ცნობიერება ნათელია. კოგნიტიურ დარღვევებს ხშირად თან სდევს და ზოგჯერ წინაც უსწრებს ემოციათა კონტროლის უნარის დაქვეითება, სოციალური ქცევის ან მოტივაციის დარღვევები.}}

ამ ნივთიერებას მიეკუთვნება დონეპეზილი, გალანტამინი და რივასტიგმინი. ამავე რიგს ეკუთვნის ორგანოფოსფატები და კარბამატები, მათ პესტიციდებში იყენებენ.

მაგრამ არსებობენ უფრო ძლიერი ქოლინესტერაზის ინჰიბიტორები, რომელსაც სამხედროები როგორც მომწამვლელ ნივთიერებებს ისე იყენებენ - ზარინი, VX-ი და "Новичок"-ი.

ამ უკანასკნელთა მოქმედების შედეგად ირღვევა ნერვული სისტემის მუშაობა, გულისცემა ნელდება, გამოიყოფა დიდი რაოდენობით ნერწყვი, წარმოიქმნება ოფლიანობა და ადამიანს მოსდის ცრემლები. ვითარდება შარდის შეუკავლობა და დიარეა, იწყება პირღებინება.

უფრო მძიმე შემთხვევაში ადამიანი სრულად პარალიზებულია, უჭირს სუნთქვა, ვარდება კომაში და საბოლოოდ ის შეიძლება გარდაიცვალოს.

მოწამვლის სიმპტომები შიძლება მომენტალურად გამოვლინდეს, ან რამდენიმე წუთის ან საათის შემდეგ.

ამ ჯგუფის ნივთიერება ადამიანის ორგანიზმში შეიძლება მოხვდეს, თვალებიდამ, კანიდან, კუჭნაწლავის სისტემოდან, ან ის უბრალოდ შეიძლება შეისუნთქოს.