აშშ-ში, ლუიზიანას პოლიციამ შეიარაღებული შავკანიანი მამაკაცი , 31 წლის ტრეიფორდ პელერინი, დაკავების დროს მოკლა.სროლა ლუიზიანას ქალაქ ლაფაიეტში მოხდა.

უფლებადამცველები ინციდენტს პოლიციის მიერ ფერადკანიანებზე ძალადობის კიდევ ერთ ფაქტად მოიხსენიებენ.

ადგილობრივი პოლიციის ცნობით, სამართალდამცველებს მცირე მაღაზიის ყაჩაღობის შესახებ შეატყობინეს, რის შემდეგაც ისინი შემთხვევის ადგილზე გამოცხადდნენ. აფროამერიკელი მამაკაცი დანით იმუქრებოდა და დაკავების დროს პოლიციელებს წინააღმდეგობას უწევდა. შეტაკების დროს პოლიციამ ცეცხლსასროლი იარაღი გამოიყენა. დაჭრილი საავადმყოფოში გადაიყვანეს, თუმცა ის გარდაიცვალა.

თვითმხილველების მიერ გადაღებულ ვიდეოში, რომელიც სოციალურ ქსელებში გავრცელდა, ჩანს თუ როგორ უახლოვდება ექვსი პოლიციელი აფროამერიკელ მამაკაცს და მას მაღაზიაში მიმალვის საშუალებას არ აძლევს. შემდეგ მას ახლო მანძილიდან ცეცხლს გაუხსნეს და რამდენჯერმე ესროლეს.

სახელმწიფო პოლიციამ მომხდართან დაკავშირებით გამოძიება დაიწყო.