რუსული მედიის ინფორმაციით, გუშინ, 18 აგვისტოს 16:00 საათზე მოსკოვის ვნუკოვოს აეროპორტიდან გაფრინდა სპეც-ავიალაინერი ტუ-214 , საბორტო ნომრით RA-64523. იგი 17:17 წუთზე მინსკის საერთაშორისო აეროპორტში დაეშვა.

გავრცელებული ინფორმაციით, აღნიშნული თვითმფრინავი 2013 წელს გადაეცა რუსეთის უშიშროების ფედერალურ სამსახურს. რუსული და უკრაინული საინფორმაციო წყაროები ავრცელებენ ინფორმაციას, რომ თვითმფრინავი აქტიურად გამოიყენებოდა ფსბ-ს დირექტორის, ალექსანდრე ბორტნიკოვის მიერ. სწორედ აღნიშნული თვითმფრინავით ჩაფრინდა ბორტნიკოვი ვაშინგტონში 2015 წელს, სადაც საერთაშორისო სამიტი ძალადობრივი ექსტრემიზმის საწინააღმდეგო ღონისძიებების გატარების შესახებ მიმდინარეობდა.

შეგახსენებთ, რომ მიუხედავად ევროპისა და ამერიკის მიერ ბელარუსის არჩევნების არ აღიარებისა, ლუკაშენკოს გაპრეზიდენტებას მორიგი ვადით ლეგიტიმურად მიიჩნევს ვლადიმირ პუტინი და მხარდაჭერას უცხადებს მას.

3 დღის წინ ალექსანდრ ლუკაშენკომ აგრეთვე განაცხადა, რომ რუსეთი მზად იქნება დაიცვას ბელარუსის ნაციონალური ინტერესი პირველივე თხოვნის შემდეგ და უზრუნველყოს ქვეყნის შიგნით უსაფრთხო გარემო.