ცნობილმა რუსმა ოპოზიციონერმა ბორის ნემცოვმა, ევროპის ქვეყნების მეთაურებს მოუწოდა ისარგებლონ სოჭის ზამთრის ოლიმპიადით და მოითხოვონ პოლიტიკური პატიმრების გათავისუფლება რუსეთში. ტელეარხ ZDF-თან ინტერვიუში, ნემცოვმა განაცხადა, რომ თუ „გრინფის“-ის აქტივისტები, პანკ-ჯგუფ Pussy Riot-ის წევრები და სხვა ცნობილი პოლიტპატიმრები არ გათავისუფლდებიან, ევროპელებმა ბოიკოტი უნდა გამოუცხადონ სოჭის ოლიმპიადას.

რუსეთის ფედერაციის ყოფილმა პირველმა ვიცე-პრემიერმა გერმანიის ფედერაციული რესპუბლიკის კანცლერს ანგელა მერკელს მოუწოდა ისარგებლოს თავისი განსაკუთრებული ზეგავლენით რუსეთის პრეზიდენტ ვლადიმერ პუტინზე. ნემცოვი დარწმუნებულია, რომ პუტინი, ბოლოს და ბოლოს, არ მოისურვებს სოჭის ოლიმპიადის ჩატარებას მხოლოდ ბელარუსელი ალექსანდრე ლუკაშენკოს მსგავსი პოსტსაბჭოთა დესპოტების გარემოცვაში.

ბორის ნემცოვმა ასევე გამოთქვა აზრი, რომ  კორუფციისა და ოლიმპიური ობიექტების მშენებლობებზე მუშათა ექსპლუატაციის გამო, სავარაუდოა, რომ სოჭში შეჯიბრებებზე უბედური შემთხვევები მოხდება.

„ყველაზე დიდი რისკი პუტინისთვის არის არა ტერაქტები, არამედ ეკოლოგიური ზიანისა და დაუდევრობის შედეგები, ასე რომ კარგი იქნება, თუ ლეტალურ შედეგებს გადავურჩებით“, - თქვა რუსმა ოპოზიციონერმა.