ბელარუსის საგარეო საქმეთა სამინისტროს პრეს-მდივანმა, ანატოლი გლაზმა ადგილობრივ მედიას დაუდასტურა, რომ დიპლომატიური უწყების ამერიკისა და დასავლეთ ევროპის დეპარტამენტის ხელმძღვანელმა, ანდრეი ბუშილომ თანამდებობა დატოვა.

მისი თანამდებობიდან წასვლის შესახებ ინფორმაცია ადრეც გავრცელდა- მან 2 დღის წინ ფეისბუქის ოფიციალურ გვერდზე მასობრივი დემონსტრაციების მთავარი სიმბოლოს, ბელარუსის პირველი რესპუბლიკის დროშის ფოტო გამოაქვეყნა.

თანამდებობა დატოვა აგრეთვე ბელარუსის ელჩმა სლოვაკეთში, იგორ ლეშენიამ.

„მე გადადგომის შესახებ განცხადება დავწერე. ეს ძალზე ლოგიკური და შესაბამისი ნაბიჯია-იმის გამო, რომ მე მოქმედი პრეზიდენტის მიერ ვარ დანიშნული, მოიაზრება რომ მის მიერ დადგენილი პოლიტიკა უნდა გავატარო. საგარეო საქმეთა სამინისტრო მიიჩნევს,რომ ჩემს მიერ გამოხატული სამოქალაქო პოზიცია ფარგლებს სცდება“- განაცხადა იგორ ლეშენიამ.

შეგახსენებთ, რომ დიპლომატმა ლეშენიამ საპროტესტო აქციებს სოლიდარობა გამოუცხადა-მან ვიდეომიმართვა ჩაწერა და აღნიშნა, რომ ყოვლად დაუშვებელია ქვეყანაში მიმდინარე ძალადობრივი აქტები, რომელიც აუცილებლად უნდა შეჩერდეს.