საბერძნეთის სანაპიროს დაცვის ძალებმა ცეცხლი გაუხსნეს თურქულ ნავს, რომელიც საბერძნეთის ტერიტორიულ წყლებში გადაადგილდებოდა. ინციდენტს ადგილი ჰქონდა კუნძული როდოსის მიმდებარე ტერიტორიაზე. აღნიშნულის შედეგად თურქული მცურავი საშუალება ჩაიძირა. თურქული მედიის თქმით, 2 თურქისა და ერთი სირიელი მოქალაქის ევაკუაცია მათმა ხომალდება მოახდინეს.

დაცხრილვის შედეგად, 3 ადამიანი დაიჭრა, რომელთაგან ერთის მდგომარეობა კრიტიკულია. ევაკუირებული ადამიანები ქალაქ მარმარისის მიმართულებით არიან გადაყვანილები. თურქეთის სამთავრობო უწყებებმა სოციალურ ქსელში ფოტოები გამოაქვეყნეს, სადაც ასახულია ბერძენი სამხედროების მცდელობა, ჩაეძირათ ნავი.

შეგახსენებთ, რომ აღმოსავლეთ ხმელთაშუაზღვისპირეთში ძალზე დაიძაბა მდგომარეობა საბერძნეთსა და თურქეთს შორის მას შემდეგ, რაც თურქეთმა საბერძნეთის ტერიტორიული წყლების სიახლოვეს საკვლევი ხომალდები გაგზავნა, რომლებიც სწავლობენ აღნიშნულ ზონას, რათა მომავალში დაიწყონ საბურღი სამუშაოები წყლიდან ნავთობის ამოსატუნბად.

ორშაბათს თურქულმა საკვლევმა ხომალდმა, ორაკ რისმა და მისმა დამხმარე გემებმა დაიწყეს ოპერირება კვიპროსსა და საბერძნეთს შორის არსებულ ტერიტორიულ წყლებში, სადაც 23 აგვისტომდე დარჩებიან. აღნიშნული ხომალდის ესკორტირებას თურქული საბრძოლო ხომალდები ახდენდნენ.

ოფიციალურმა ათენმა თურქეთის ამ ქმედებას არალეგალური აქტი უწოდა, რომელიც საბერძნეთის სუვერენულ უფლებათა შელახვისკენაა მიმართული. ბერძენი სამხედრო მაღალჩინოსნების თქმით, თურქული ხომალდი საბერძნეთის კონტინენტური შელფის ტერიტორიის შიგნით იმყოფება. საბერძნეთის სამხედრო უწყებამაც სრული განგაში გამაოცხადა- საბრძოლო ხომალდები პატრულირებენ და აკვირდებიან ორაკ რისის გადაადგილების მიმართულებას.