სომხეთში რუსეთის ფედერაციის პრეზიდენტის - ვლადიმერ პუტინის ვიზიტისთვის ემზადებიან. ვიზიტი 2 დეკემბერსაა დაგეგმილი. პუტინი მონაწილეობას მიიღებს მესამე რეგიონულ სომხურ-რუსულ ეკონომიკურ ფორუმში, ასევე ეწვევა გიუმრის, სადაც 102-ე რუსული ბაზაა განლაგებული.

- ევრაზიული ინტეგრაციის მომხრეები რუსეთის ლიდერისგან მხარდაჭერას ელიან. მან ძლიერი არგუმენტები უნდა მოიყვანოს სომხეთის არჩევანის სისწორესთან მიმართებაში, რაც ადგილობრივი საზოგადოების პოზიციებს გაამყარებს, განსსაკუთრებით იმის გათვალისწინებით, რომ ხუთი წელი ევროინტეგრაციის სასარგებლოდ მიდიოდა აგიტაცია, - განუცხადა „იზვესტიას“ სომხეთის პოლიტოლოგების ასოციაციის ხელმძღვანელმა ამაიაკ ოვანესიანმა.

- სომხეთი ყოველთვის ითვლებოდა საიმედო და პატიოსან პარტნიორად რუსეთთან ურთიერთობებში, რასაც ადასტურებს სომეხი პრეზიდენტის განცხადება ევრაზიული კურსის განვითარების ვალდებულებაზე, - აღნიშნა სახელმწიფო-სამართლებრივ საკითხებში კომისიის წევრმა ოვანეს სააკიანმა.

სომხეთის დემოკრატიული პარტიის მეთაურმა - არამ სარქისიანმა აღნიშნა, რომ მოლაპარაკებების შედეგად ელის რუსეთის ფედერაციაში სომხური ტვირთების ტრანზიტის აღდგენას აფხაზეთის რკინიგზის მონაკვეთზე. ასევე, გეოპოლიტიკური ღერძის - რუსეთი-სომხეთი-ირანის გაძლიერებას. მისი აზრით, ამ პროექტში, შესაძლოა, ევრაზიული კავშირის სხვა წევრებიც ჩაერთონ.

თუმცა, სომხეთში არიან ძალები, რომლებიც ევრაზიულ კავშირში შესვლის წინააღმდეგნი არიან და თვლიან, რომ ამ კავშირის ჩამოყალიბება რუსეთის იმპერიულ ამბიციებს ადასტურებს.

„ეროვნული თვითგამორკვევის გართიანების“ ხელმძღვანელი პარუირ აირიკიანი „იზვესტიასთან“ საუბარში აღნიშნავს, რომ  მოსახლეობის ¾ წინააღმდეგია სომხეთის ევრაზიულ კავშირში შესვლის.

- საბაჟო კავშირის წევრობა, სომხეთს დაღუპვამდე მიიყვანს, პუტინს კი სურს ის დაასრულოს, რისი კეთებაც ათათურქმა და ლენინმა დაიწყეს,- მიიჩნევს აირიკიანი.

- ჩვენ მხოლოდ ის გვსურს, რომ სახელმწიფოს მეთაურს გავაგებინოთ ხალხის უარყოფითი შეფასება საბაჟო კავშირთან მიმართებაში და მოვთხოვოთ, რომ პრეზიდენტმა ვილნიუსში ევროკავშირის „აღმოსავლეთპარტნიორობის“ სამიტზე ვიზიტისას, ევროკავშირთან ასოცირების შესახებ შეთანხმების დადებით, ევროინტეგრაცია გაამყაროს, - ამბობს აირიკიანი.