ლეხ კაჩინსკის თვითმფრინავში რუსეთში ჩატარებული რემონტის დროს ტროტილი იყო ჩადებული

ლეხ კაჩინსკის თვითმფრინავში რუსეთში ჩატარებული რემონტის დროს ტროტილი იყო ჩადებული - საგამოძიები კომისიის დასკვნა

მსოფლიო - 09:54, 01 Aug, 2020

3045

რადიო "Эхо Москвы"-ს ინფორმაციით, პრეზიდენტ ლეხ კაჩინსკის თვითმფრინავის კატასტროფის განმეორებითი საგამოძიებო კომისია მივიდა დასკვნამდე, რომ რუსეთში ჩატარებული სარემონტო სამუშაოების დროს ТУ-154-ში ტროტილი იყო ჩადებული. კომისიის დასკვნა 31 ივლისს გამოქვეყნდა.

ანგარიშში აღნიშნულია, რომ ასაფეთქებელი ნივთიერებების კვალი სავარაუდოდ იმ ნაწილებზე აღმოჩნდა, რომელიც რუსმა ტექნიკოსებმა რემონტის დროს 2009 წელს გამოცვალეს.

კომისიის მასალებში აღნიშნულია, რომ ავიაკატასტროფის მიზეზი თვითმფრინავის ცენტრალურ ნაწილსა და მარცხენა ფრთაში მომხდარი აფეთქებებია.

პოლონელი სპეციალისტების აზრით, ამაზე მეტყველებს თვითმფრინავის დაზიანებების ხასიათი, ნამსხვრევების გაფანტვის სახე და ტრავმები, რომელიც მგზავრებმა მიიღეს.

კომისიამ ჩათვალა, რომ მძიმე დამწვრობები და დაღუპულთა გვამებში აღმოჩენილი შუშის, თვითმფრინავის გარსისა და მეტალის ნამსხვრევები აფეთქების მიერ არის გამოწვეული.

ახალი ვერსიის თანახმად, პირველმა აფეთქებამ დაამსხვრია თვითმფრინავის მარცხენა ფრთა, ხოლო მეორე ბომბი, ცენტრალურ ნაწილში, მაღალი თანამდებობის პირების სალონის მიმდებარედ აფეთქდა.

დასკვნაში ნათქვამია, რომ ასაფეთქებელი ნივთიერების - ტროტილისა და ჰექსოგენის კვალის არსებობა თვითმფრინავის ბორტზე დადასტურებულია როგორც პოლონური, ასევე ბრიტანული კვლევითი ლაბორატორიის მიერ.

რუსეთის მაღალ ეშელონებში ამ საკითხზე კომენტარი ჯერ არ გაუკეთებიათ.ლაინერი ТУ-154, რომელშიც პოლონეთის პრეზიდენტი ლეხ კაჩინსკი, ქვეყნის პირველი ლედი და სამთავრობო დელეგაცია იმყოფებოდა, სმოლენსკთან 2010 წლის აპრილში ჩამოვარდა, რასაც 96 ადამიანი ემსხვერპლა.