86 წლის შემდეგ პირველად, აია სოფიაში მუსლიმთა პარასკევის ლოცვა ჩატარდება. თურქული მედიის ინფორმაციით, ლოცვა 10:00 საათზე დაიწყება და მას ქვეყნის პრეზიდენტი, რეჯეფ თაიფ ერდოღანიც დაესწრება.

მლოცველებს ხუთი სხვადასხვა ღია სივრცე დაეთმობათ. უსაფრთხოებისთვის ლოცვამდე და ლოცვის დროს სტამბოლში რამდენიმე ქუჩა და მეტროს სადგური დაიკეტება.

ბიზანტიის იმპერატორმა იუსტინიანემ აია სოფიას ქრისტიანული ტაძარი 537 წელს ააშენა. ტაძარი მეჩეთად 1453 წელს გადაკეთდა, ხოლო მუსტაფა ქემალ ათათურქის მმართველობის დროს, აია სოფიას მუზეუმის სტატუსი მიენიჭა.

რამდენიმე დღის წინ, თურქეთის სასამართლომ აია სოფიას მუზეუმის სტატუსი გააუქმა და პრეზიდენტმა ერდოღანმა აია სოფია ისევ მეჩეთად გადაკეთების გადაწყვეტილება მიიღო.