ამერიკის სახელმწიფო დეპარტამენტი თავის ოფიციალურ გვერდზე უელსის დეკლარაციის ხელმოწერიდან 80 წლისთავის აღნიშვნასთან დაკავშირებით განცხადებას აქვეყნებს. აღნიშულ წერილს ხელს ამერიკის სახელმწიფო მდივანი მაიკ პომპეო აწერს. დოკუმენტში საუბარია საქართველოსა და უკრაინაზეც, რომელთა მიმართ რუსეთი განაგრძობს საოკუპაციო პოლიტიკას.

„უელსის დეკლარაცია არის საამაყო მომენტი აშშ-ს საგარეო პოლიტიკის ისტორიაში, რომელიც გამოხატავს ჩვენს მეგობრულ აქტს ესტონელი, ლიტველი და ლატვიელი ხალხის მიმართ. 80 წლის წინ, აშშ-მა უარი განაცხადა ბალტიის ქვეყნების საბჭოთა კავშირში გაერთიანების აღიარებაზე. სსრკ-ს კრიმინალური აქტი განხორციელდა 1939 წლის 23 აგვისტოს მოლოტოვ-რიბენტროპის შეთანხმების საიდუმლო პუნქტის საფუძველზე. მიუხედავად ამ ბნელი დღეებისა, ბალტიის ქვეყნების ხალხს არ დაუკარგავთ იმედი, რომ საბჭოთა კავშირის პატიმრობაში მყოფი ერების კარები გაიღებოდა“.

„უელსის დეკლარაცია არ გახლავთ ჩვეულებრივი ისტორიული არტეფაქტი- აშშ-მა როგორც ბალტიის ქვეყნების იძულებითი გაერთიანება სსრკ-ში არ აღიარა, ანალოგიურად, ჩვენთვის ყოველთვის მიუღებელი იყო და იქნება რუსეთის თავდასხმა და ხელყოფა საქართველოსა და უკრაინის ტერიტორიულ მთლიანობაზე, რომელსაც მოსკოვი ახორციელებდა ყირიმის ანექსიით, მარიონეტების მხარდაჭერითა და აღმოსავლეთ უკრაინაში სიტუაციის დესტაბილიზაციით, აგრეთვე საქართველოში აფხაზეთისა და სამხრეთ ოსეთის ოკუპაციით“ - აღნიშნა პომპეომ

შეგახსენებთ, რომ უელსის დეკლარაცია იყო დიპლომატიური განცხადება, რომელიც 1940 წლის 23 ივლისს აშშ-ს სახელმწიფო მდივანის, სამნერ უელსის მიერ გამოქვეყნდა. აღნიშნულ განცხადებაში ოფიციალური ვაშინგტონი გმობდა საბჭოთა კავშირის მიერ ბალტიისპირეთის სამივე ქვეყნის- ესტონეთი, ლატვიისა და ლიტვის ოკუპაციას და უარს აცხადებდა ანექსირებული საბჭოთა რესპუბლიკების ოფიციალურად ახალი სახელმწიფო სტატუსის მქონე ქვეყნებად აღიარებაზე.