სამხრეთ ირანში, ბუშერის პორტში არსებულ გემთსაშენ ქარხანაში 7 გემი დაიწვა- ამის შესახებ ინფორმაციას სახელმწიფო მედია ავრცელებს.

ადგილობრივი კრიზისების მმართველი ორგანიზაციის განცხადებით, ხანძარი უკვე ლოკალიზებულია და გავრცელებული ინფორმაციით, არავინ დაშავებულა. ინციდენტის გამომწვევი მიზეზი ამ დრომდე უცნობია, თუმცა ეს ფაქტი ერთ-ერთია მხოლოდ იმ საიდუმლოებით მოცულ მოვლენებში, რომლებიც უკანასკნელი კვირების განმავლობაში მოხდა ირანის ბირთვულ კომპლექსებზე, ელექტროსადგურებზე, სამედიცინო კლინიკებსა და სარაკეტო ობიექტებზე.

ადგილობრივ მედიაში აქტიურად უკავშირებენ აღნიშნული ფაქტების კვალს უცხოურ სპეცსამსახურებს. ორშაბათს ირანის ინდუსტრიულ ზონაში, ჩრდილო აღმოსავლეთ ქალაქ მაშადში დაფიქსირდა ხანძარი, რა დროსაც გაზის საცავებში ცეცხლი გაჩნდა და ერთ-ერთი მათგანი აფეთქდა.

ირანელი მაღალაჩინოსნები აცხადებენ, რომ მოკვლევა მიმდინარეობს აღნიშნული ფაქტები უკავშირდება თუ არა უცხო ძალების მიერ ორგანიზებულ საბოტაჟს, რომელთა მთავარი სამიზნე 1თვის წინ შესაძლოა, ყოფილიყო ნათანზის ურანის გამამდიდრებელი საწარმო და რაკეტის მწარმოებელი ქარხანა ხოჯირში.