გამთენიისას 16 ივლისს, აზერბაიჯანსა და სომხეთის სახელმწიფო საზღვარზე საბრძოლო შეტაკებები განახლდა. ორივე მხარემ წარმოადგინა ფოტო-ვიდეო მტკიცებულებები, რომლითაც ირკვევა, რომ აზერბაიჯანის ტოვუზისა და სომხეთის თავუშის სასაზღვრო ზოლის მიმდებარე ტერიტორია იბომბება ორივე მხარის შეიარაღებული ძალების მიერ.

ოფიციალური ბაქოს ინფორმაციით, სოფლები აგამი, დონდარ გუშუ და ვახიდლი დაიცხრილა მსხვილკალიბრიანი ტყვიამფრქვევებით და დაიბომბა ნაღმტყორცნებით. ამ დრომდე მიმდინარეობს საპასუხო სროლები მიმდებარე ტერიტორიაზე. აზერბაინჯანული მედია ავრცელებს პირველ კადრებს სოფელი დონდარიდან- თავდაცვის უწყების პრესსპიკერის, ვაგიფ დიარგალუს განცხადებით, ჭურვები დაეცა საცხოვრებელ სახლებსა და მიმდებარე ტერიტორიას. აღნიშნული მდგომარეობის აღმნიშვნელ ფოტოებს მედია ავრცელებს

ანალოგიურ ინფორმაციას ავრცელებს აგრეთვე სომხეთის თავდაცვის სამინისტროს პრესმდივანი, შუშან სტეპანიანი, რომელმაც აღნიშნა, რომ აზერბაიჯანულმა შეიარაღებულმა ძალებმა სცადეს დივერსანტთა სომხეთის ტერიტორიაზე გადასხმა , რასაც თან სდევდა აგრეთვე დაბომბვა სოფელ აიგეპარის მიმართულებაზე. სომეხთა თქმით, აზერბაიჯანანელებს ღირსეული პასუხი გაეცა.

აზერბაიჯანის თავდაცვის სამინისტრო ავრცელებს აგრეთვე პირველ კადრებს, რომლითაც ირკვევა, რომ სამხედროებმა ჩამოაგდეს X-55-ის ტიპის სომხური სადაზვერვო უპილოტო საფრენი აპარატი, რომელიც აზერბაიჯანელთა არმიის პოზიციებს ზვერავდა ტოვუზის რაიონში. დრონი მსხვილკალიბრიანი ტყვიამფრქვევებით იქნა ნეიტრალიზებული.