ცნობილი საერთაშორისო კურორტი იბიცა ეპატიჟება ევროპის კონტინენტის სამედიცინო მუშაკებს კუნძულზე და დასვენების განმავლობაში სთავაზობს საცხოვრებლით უფასო უზრუნველყოფას. ინიციატივა ეკუთვნის კუნძულის მთავრობასა და აღნიშნულ ტერიტორიაზე მოქმედ ბიზნესმენებს, რომელთაც ამ ფორმით სურთ, მადლობა გადაუხადონ ევროპელ მედიცინის მუშაკებს მათ მიერ გაწეული ღვაწლისთვის კორონავირუსთან ბრძოლაში.

ხუან მიგელ კოსტამ, იბიცას ტურიზმის საბჭოს მრჩეველმა განაცხადა, რომ ეს გეგმა მიზნად ისახავს ექიმებისთვის ე.წ კომპენსაციის გაწევას კორონავირუსულ პერიოდში უამრავი სიცოცხლის გადარჩენის გამო.

გავრცელებული ინფორმაციით, სხვადასხვა ქვეყნის ევროპელ მედიცინის მუშაკებისთვის უფასო დასვენება შეთავაზებული იქნება 2021 წლის აპრილშ, მაისში ან ოქტომბერში.

სულ 60-მდე სასტუმრო და კერძო სახლი მიიღებს და უზრუნველყოფს უფასო მომსახურებით ექიმებს. ექიმებისთვის უფასო ოთახები მოეწყობა ისეთ მდიდრულ სასტუმროებში, როგორიცაა ATZARO, AGUAS DE IBIZA და OD Hoteles.

ბრიტანული მედიის თქმით, საერთო ჯამში 1000 ექიმისთვის მოეწყობა დასვენების 1 კვირიანი პაკეტი, სადაც საცხოვრებლით უფასო უზრუნველყოფასთან ერთად, მედიცინის მუშაკები სხვადასხვაგვარი პრიზებითაც დასაჩუქრდებიან.