გაერო-ს სირიის მოვლენების შემსწავლელი საგამოძიებო კომისიის დასკვნით, ბაშარ ასადის რეჟიმისა და რუსეთის სამხედრო ძალების მიერ სირიაში, იდლიბზე განხორციელებული ავიაშეტევები სამხედრო დანაშაულია.

გაერო-ს გამომძიებლების თქმით, მიმდინარე წლის მარტში, თურქეთთან მიღწეული ცეცხლის შეწყვეტის შეთანხმების დროს, რუსულმა ავიამოიერიშეებმა და პრეზიდენტ ბაშარ ასადის საჰაერო ძალებმა სასიკვდილო შეტევები განახორციელეს მშვიოდბიან მოსახლეობაზე. დაინგრა და დაიწვა საცხოვრებელი სახლები, სკოლები, საავადმყოფოები და სავაჭრო პუნქტები. დაიღუპა და დაშავდა ასობით ადამიანი. მილიონამდესირიელი დევნილად იქცა. სპეციალური კომისიის განცხადებით, ეს კაცობრიობის წინაშე ჩადენილი სამხედრო დანაშაულია.

სირიის მოვლენების შემსწავლელმა გაერო-ს საგამოძიებო კომისიამ ასევე დაადანაშაულა ჯიჰადისტთა ჯგუფი "ჰაიატ ტაჰრირ აშ-შამი". მათ მოსახლეობაზე თავდასხმა, საარტილერიო შეტევა, ტყვეების წამება და სიკვდილით დასჯა ედებათ ბრალად. დოკუმენტში ნათქვამია, რომ სახელისუფლებო ძალებიც და ტერორისტებიც უხეშად არღვევდნენ ომის კანონებსა და ადამიანის უფლებებს.

ანგარიში მოყვანილია სირიაში 2019 წლის ნოემბრიდან 2020 წლის ივნისის ჩათვლით განვითარებული მოვლენების ამსახველი ფაქტები. დოკუმენტში აღწერილია 52 შეტევა სირიის ჩრდილო-დასავლეთ ნაწილზე, რომელთაგან 47 რუსულმა მხარემ განახორციელა.