"პირბადეები გამოცდის დაწყებისთანავე მოვიხსენით, კონდინციონერი არ იყო ჩართული" - როგორ მიმდინარეობს ეროვნული გამოცდები კორონავირუსის პირობებში

საზოგადოება - 11:52, 06 Jul, 2020

662

კორონავირუსის პანდემიის მიუხედავად დღეს ერთიანი ეროვნული გამოცდები დაიწყო. გამოცდები ქართულ ენასა და ლიტერატურაში ჩატარდა.

გამოცდიდან გამოსული აბუტურიენტები ამბობენ, რომ ტესტზე მუშაობა არ გაჭირვებიათ, საგამოცდო პირობებიც ნორმალური იყო.
ელენე, თბილისის 177-ე საჯარო სკოლის საგამოცდო ცენტრი: ,ესე იყო ასეთ თემაზე – ზღუდავს თუ არა ტექნოლოგიები ადამიანებს. ასევე მოვიდა ნოდარ დუმბაძის “ნუ გააღვიძებ”. “ვეფხისტყაოსანიც” მოვიდა, მაგრამ არ დამიწერია. სხვა მხრივ ნორმალური სიტუაცია იყო, არც ცხელოდა, პირბადეები გამოცდის დაწყებისთანავე მოვიხსენით. კონდინციონერი არ იყო ჩართული, მაგრამ არც საჭირო იყო. საერთოდ არანაირი დისკომფორტი არ შემქმნია, პირიქით, შესვლიდანვე ყველაფერი კარგად იყო.
დიტო ბურდული, თბილისი 173-ე საჯარო სკოლის საგამოცდო ცენტრი: “გამოცდის დაწყებამდე ყველა ის პროცედურა გავიარეთ, რაც წინასწარ ვიცოდით, არ ცხელოდა და დამკვირვებლები და გარემოც ძალიან მეგობრული იყო. ეს ძალიან მნიშვნელოვანი იყო სტრესის მოსახსნელად. რაც შეეხება საკითხებს, რედაქტირების ტექსტი ეხებოდა ანტიკურ ხანაში აღმოჩენილ საყურეს და მე მგონი კარგად დავწერე. ესე იყო იმის შესახებ, რომ განვითარებული ტექნოლოგიები ადამიანს ხელს უშლის განვითარებაში. ლიტერატურიდან ერთი იყო ავთანდილის და შერმადინის საუბარი, მეორე იყო ნოდარ დუმბაძის მოთხრობა, რომელიც ავირჩიე. მოთხრობის ერთ-ერთი პერსონაჟი იყო კუკური, რომელიც ყიდდა ძროხას, რომ თავის დისთვის სწავლის საფასური გადაეხადა და დახმარებოდა ოჯახს, ანუ ეს საკითხი ვწერე. ზოგადად ძალიან მარტივად მეჩვენა ტესტი და ადრეც დავასრულე.”
ცნობისთვის, კორონავირუსის პანდემიის გამო წელს ეროვნული გამოცდები მედიკოსების რეკომენდაციების დაცვის მიხედვით ჩატარდება. აიკრძალა კონდიციონერის ჩართვა, გამოცდაზე აუცილებელია პირბადე და სხვა.
წყარო: EDU.ARIS.GE