რუსულ სოციალურ ქსელებში ვრცელდება სენსაციური კადრები, სადაც ასახულია პუტინისთვის საპრეზიდენტო ვადის განულებისთვის საკონსტიტუციო ცვლილების მისაღებად ხმის მიცემის პროცესის აქტიური გაყალბება ხელისუფლების მიერ.

ოპოზიციონერი პოლიტიკოსის ნავალნის შტაბი და რუსი ბლოგერები ტვიტერის გვერდებზე აქვეყნებენ ვიდეოებს, სადაც ნათლად ჩანს გაყალბების ფაქტები- მოქალაქეებმა, რომლებიც საარჩევნო უბნებთან ოჯახის წევრებთან ერთად მივიდნენ, აღმოაჩინეს, რომ სხვებს მათი სახელით საარჩევნო ჟურნალებში ხელმოწერა აქვთ დაფიქსირებული. მათი მონაცემების გამოყენებით აგრეთვე უკვე ბიულეტენი ჩაგდებულია საარჩევნო ყუთებში.

შეგახსენებთ, რომ რუსეთში მმართველი პარტიის ინიცირებით ხმის მიცემის პროცესი ვლადიმერ პუტინისთვის ხელახალი საპრეზიდენტო ვადის „მომზადებისთვის“ მიმდინარეობს. საკონსტიტუციო ცვლილებაზე საყოველთაო კენჭისყრა რუსეთში 25 ივნისს დაიწყო და 1 ივლისამდე გაგრძელდება. ცესკოს ინფორმაციით, ამომრჩევლის აქტივობამ 30 პროცენტი შეადგინა. ცვლილების თანახმად, პუტინს მიმდინარე ვადის დასრულების შემდეგ, 2024 წელს საპრეზიდენტო არჩევნებში მონაწილეობა კიდევ ერთხელ შეეძლება.