ჯანმრთელობის მსოფლიო ორგანიზაციის პრეზიდენტმა, ტედროს ადჰანომმა კორონავირუსის ხელახალ მასშტაბურ გავრცელებასა და დაავადების მიერ „ძალების აღდგენაზე“ ისაუბრა.

„მიუხედავად იმისა, რომ ზოგიერთმა ქვეყანამ გარკვეულ პროგრესს მიაღწია კოვიდ 19-თან ბროლაში, პანდემია გავრცელების მხრივ ნამდვილად იკრებს სიჩქარეს. ჩვენ გვინდა რომ ეს ყველაფერი დასრულდეს, თუმცა რთული რეალობა გვიჩვენებს, რომ პანდემია დასრულებასთან ახლოსაც კი არ არის“ - განაცხადა ადჰანომმა. ამის შესახებ წერს CNBC-ი.

„ყველაზე უარესი ჯერ კიდევ წინაა- ძალზე ბევრი ერი და მსოფლიო ლიდერი ჯერ კიდევ დაყოფილია და არ იბრძვიან ერთიანად ვირუსის წინააღმდეგ. ვწუხვარ, რომ ამის თქმა მიწევს, მაგრამ დღევანდელი სახის გარემოსა და მდგომარეობის გათვალისწინებით, ჩვენ უარესის მოლოდინში ვართ. სწორედ ამიტომ ჩვენ უნდა გავერთიანდეთ და ვებრძოლოთ ამ საშიშ ვირუსს“.

ტედროსის თქმით, ქვეყნებმა ერთმანეთისგან უნდა ისწავლონ ვირუსთან ბრძოლა- პანდემიამ აჩვენა, რომ მსოფლიო სოლიდარობის ნაკლებობამ გამოიწვია ძალზე დიდი შეფერხება და პრობლემების შექმნა. შეგახსენებთ, რომ კორონავირუსის 10 მილიონზე მეტი შემთხვევაა დაფიქსირებული, რომელთაგან 5,7 მილიონი ადამიანი უკვე გამოჯანმრთელდა. დაიღუპა 508 250 პაციენტი. ვირუსი მასშტაბურად ვრცელდება ბრაზილიაში, ამერიკასა და რუსეთში ყოველდღიურად. გავრცელებული ინფორმაციით, კრიტიკულ მდგომარეობაში მყოფ ადამიანთა რაოდენობა 58 000-მდეა.