"გაჭირვებული, უბედური ოჯახი იყო და შეიძლება ფულის გამო გააკეთეს ეს" - დუშეთში მცხოვრები წყვილის მეზობლების პირველი კომენტარი, ჩვილის გაყიდვასთან დაკავშირებით

საზოგადოება - 20:05, 23 Jun, 2020

638

ახალშობილით ვაჭრობის საქმე - გაყიდული ჩვილის მშობლების მეზობლები ყვებიან, რომ უკიდურეს გაჭირვებაში მყოფი ოჯახის მიერ ჩვილის გაყიდვის შესახებ ტელევიზიით შეიტყვეს და მეზობლები უკვე რამდენიმე დღეა, აღარ უნახავთ.

მეზობლების თქმით, დაკავებულებმა დანაშაული სავარაუდოდ, უსახსრობის გამო ჩაიდინეს, თუმცა ისინი გაჭირვებას დანაშაულის გამამართლებელ გარემოებად არ მიიჩნევენ.

ცნობილია, რომ ჩვილის დედა დააკავეს უშუალოდ მაშინ, როდესაც თანხას იღებდა საკუთარი ჩვილის სანაცვლოდ. ჩვილის მამა კი სამუშაო ადგილას - დუშეთის უნარშეზღუდულთა პანსიონში.

პანსიონის თანამშრომლები ამბობენ, რომ მათ არ ჰქონდათ ინფორმაცია დანაშაულის შესახებ და მომხდარი მხოლოდ მაშინ შეიტყვეს, როცა ადგილზე სამართალდამცავები მივიდნენ.

"ვიცით, რომ გუშინ დააკავეს, მაგრამ დანარჩენი, ჩვენ პირადად, ნამდვილად არაფერი არ ვიცით... უშუალოდ შევესწარი იმას, რომ ჩემი კაბინეტიდან როცა გამოვდიოდი, ბატონი მამუკა რამდენიმე პირის თანხლებით გამოვიდა პანსიონატიდან", - იხსენებს პანსიონატის ერთ-ერთი თანამშრომელი.