პირველ საუნივერსიტეტო კლინიკაში ამ დროისთვის კოვიდინფიცირებულები აღარ არიან.

კლინიკის დირექტორი ლევან რატიანი აცხადებს,რომ სამედიცინო დაწესებულება მუშაობის ჩვეულ რეჟიმს პირველი ივლისიდან დაუბრუნდება.

რატიანი კორონავირუსით ინფიცირებულების მკურნალობის ეტაპებს იხსენებს. მედიკოსი ამბობს, რომ ყველაზე რთულად მას და მის კოლეგებს პირველი პაციენტის გარდაცვალება ახსოვთ.

„საბედნიეროდ ჩვენ გადავრჩით. რა ფაქტორმა გადაგვარჩინა ამას მეცნიერები ალბათ, მოგვიანებით დადებენ. საბედნიეროდ „დარჩი სახლში“ პრინციპმა იმოქმედა და ინფექცია არ გავრცელდა.

ყველაზე მეტად რაც მიჭირდა იყო როდესაც პირველად დაფიქსირდა გარდაცვალების შემთხვევა. თავიდან არ ვიცოდი როგორ გამომეცხადებინა ეს ინფორმაცია. ამ დროს ჩვენთან 130 პაციენტი გვყავდა.

მას შემდეგ, რაც გარდაცვალების პირველი შემთხვევა დაფიქსირდა,სათითაოდ ყველასთან შევდიოდი და ვაწყნარებდი, ვეუბნებოდი, რომ თქვენ ეს არ გემუქრებათ.

იქ ვიყავი ზუსტად გული რომ გაჩერდა. ჩამოიშალა თავიდან ბოლომდე მთელი 70-კაციანი სამსახური. ყველა ტიროდა“,- ამბობს ლევან რატიანი.