COVID-19-ის სამი ახალი შემთხვევა - თბილისის ზღვის ჰოსპიტალში აცხადებენ, რომ სამი პირიდან, რომელთაც დღეს კორონავირუსი დაუდასტურდათ, ორი აზერბაიჯანის, ხოლო ერთი საქართველოს მოქალაქეა.

სამივე ინფიცირებულის მდგომარეობა საშუალო სიმძიმისაა.

„თბილისის ზღვის ჰოსპიტალში დაფიქსირებულია სამი დადებით პასუხი, აქედან ორი არის 60 წლამდე მამაკაცი, ისინი აზერბაიჯანის მოქალაქეები არიან. სატრანზიტო ავტოსატრანსპორტო საშუალებით მოძრაობდნენ, საზღვარზე დაფიქსირდა მათთან სწრაფი ტესტით დადებითი პასუხი, რის შემდეგაც გადმოიყვანეს კლინიკაში და ჩვენთან „პისიარ“ კვლევით დადასტურდა კორონავირუსი. ერთი არის 20 წლის მამაკაცი, საქართველოს მოქალაქე, რომელთანაც დადასტურდა კორონავირუსი. პაციენტი გადაყვანილია მცხეთის სამედიცინო ცენტრში და იქ გააგრძელებს მკურნალობას. მისი ბებია ამჟამად მკურნალობს იმ კლინიკაში, სადაც თავად არის გადაყვანილი.“, – განაცხადა თბილისის ზღვის ჰოსპიტალის კრიტიკული მედიცინის დეპარტამენტის ხელმძღვანელმა, მარეხ ბექაიამ.