საქართველოში ბოლო 24 საათის განმავლობაში დადასტურებული 14 ახალი შემთხვევიდან ხუთის ინფიცირების წყარო უცნობია, – ამის შესახებ თბილისის ინფექციური საავადმყოფოს სამედიცინო დირექტორმა, მარინა ეზუგბაიამ განაცხადა.

მისი თქმით, ორი ინფიცირებული სამედიცინო პერსონალის წარმომადგენელია, ხუთი პირი კარატინის სივრციდან არის, ანუ შემთხვევა შემოტანილი, იმპორტირებულია.

„გარდა ამისა, ერთი ინფიცირებული სატვირთო ავტომობილის მძღოლია, რომელსაც კონტაქტი ჰქონდა დადასტურებულ შემთხვევასთან და ხუთი არის დაუდგენელი წყაროს, რომლისთვისაც გრძელდება ​ ჩაღრმავებული ეპიდემიოლოგიური კვლევები“, – განაცხადა მარინა ეზუგბაიამ.

ამასთან, მან განმარტა, რომ გუშინ დილით საქართველოში ახალი კორონავირუსის 837 შემთხვევა იყო დადასტურებული, რასაც დაემატა 14 და გახდა 851. ამასთან, გამოჯანმრთელებულების რიცხვი ხუთით, 702-მდე გაიზარდა. კოვიდცენტრებში 136 პაციენტი მკურნალობს.