"ვინ ვის კლავს?" - საფრანგეთის პოლიციის წარმომადგენლებმა ელისეს სასახლესთან საპროტესტო აქცია გამართეს

მსოფლიო - 17:28, 12 Jun, 2020

959

საფრანგეთის პოლიციის წარმომადგენლები მეორე დღეა საპროტესტო აქციებს მართავენ, რომელიც მიმართულია დანმაშავეთა მახრჩობელა ილეთებით შეკავების აკრძალვის წინააღმდეგ. ეს აკრძალვა ქვეყანაში გამართული ჯორჯ ფლოიდის მკვლელობის საპროტესტო აქციების შემდეგ იქმნა შემოღებული.

12 ივნისს, პარიზში, საფრანგეთის პოლიციის პროფკავშირების წარმომადგენლებმა ელისეს სასახლესთან მიტინგი გამართეს. მათ ეჭირათ პლაკატი წარწერით :არ არის პოლიცია, არ არის მშვიდობა", მეორე პლაკატზე კი გრაფიკული სახით იყო წარმოდგენილი სხეულის დაზიანებები, რომლებიც პოლიციელებმა დამნაშავეების მიერ თავდასხმის შედეგად მიიღეს. პლაკატს თან ახლდა წარწერა: - "ვინ ვის კლავს?". მათი ნაწილი შსს-ს მინისტრის გადადგომასაც ითხოვდა, რადგან მათი თქმით მინისტრმა მხარი აუბა "მსოფლიო ფსიქოზს მოძალადე პოლიციელების წინააღმდეგ".

"შეიძლება ამერიკაში პოლიციელები ძალადობენ, მაგრამ საფრანგეთი ამერიკა არაა და არც ჩვენ ვართ ამერიკელი პოლიციელები. პოლიცია არ არის პასუხისმგებელი საზოგადოებაში არსებულ ბოროტებაზე. პოლიცია არ უნდა იდგეს კანონზე მაღლა, მაგრამ ის არც კანონზე დაბლა არ უნდა იყოს," - განუცხადეს მიტინგის ორგანიზატორებმა "რადიო ფრანს ინფოს".