საქართველოს სტუდენტურმა პარლამენტმა აკადემიკოს ლევან ალექსიძის ფონდთან შეხვედრა გამართა

საზოგადოება - 18:54, 11 Jun, 2020

667

საქართველოს სტუდენტური პარლამენტის ადამიანის უფლებათა დაცვისა და სამოქალაქო ინტეგრაციის კომიტეტმა, კომიტეტის თავმჯდომარის მოადგილე კესო გიორგაძის ორგანიზებით, აკადემიკოს ლევან ალექსიძის სახელობის ფონდთან შეხვედრა გამართა. ექსპერტული მოსაზრებების გაზიარებისა და კომიტეტის წევრებისთვის საინტერესო საკითხებზე დისკუსიაში მონაწილეობა პროფესორმა ქეთევან ხუციშვილმა მიიღო. საქართველოს სტუდენტური პარლამენტის წევრებმა შეხვედრის თემად განსაზღვრეს XXI საუკუნის ერთ-ერთი საჭირბოროტო საკითხი - ადამიანით ვაჭრობა (ტრეფიკინგი): საერთაშორისო სტანდარტები და საქართველოში შექმნილი სისტემა.

ადამიანის უფლებათა დაცვისა და სამოქალაქო ინტეგრაციის კომიტეტის წევრებსა და სტაჟიორებთან შეხვედრისას განიხილეს ის საერთაშორისო სამართლებრივი ნორმები, რომლებიც ამ ტრანსანციონალური დანაშაულის პრევენციისა და აღკვეთისთვის საერთაშორისო თანამეგობრობამ შეიმუშავა. გაეროსა და ევროპის საბჭოს მიერ შემუშავებული სტანდარტებისა და საერთაშორისო პრაქტიკის ჭრილში გამოვლენილმა გამოწვევებმა სტუდენტური პარლამენტის წევრების განსაკუთრებული ყურადღება დაიმსახურა. ამასთან, შეხვედრის ფარგლებში დეტალურად იმსჯელეს საქართველოში ადამიანით ვაჭრობის (ტრეფიკინგის) წინააღმდეგ შექმნილი საკანონმდებლო ჩარჩოსა და განვითარებული პრაქტიკის თაობაზე, რაც საერთაშორისო სტანდარტების შესაბამისად ამ დანაშაულის პრევენციას, დანაშაულის მსხვერპლთა დაცვას, დამნაშავეთა ეფექტიან სისხლის სამართლებრივ დევნასა და ამ სფეროებში საქართველოს ფარგლებში სახელმწიფო და არასამთავრობო აქტორების, ასევე სხვა სახელმწიფოებთან თანამშრომლობას უდევს საფუძვლად. სტუდენტმა პარლამენტარებმა მიიღეს ამომწურავი პასუხები მათთვის საინტერესო კითხვებზე. აკადემიკოს ლევან ალექსიძის პროფესიული მემკვიდრეობისა და მისი დაფუძნებული ქართული საერთაშორისო სამართლის სკოლის გასაგრძელებლად, პროფესორ ქეთევან ხუციშვილის ინიციატივით 2019 წელს დაფუძნდა.