რუსეთის პრეზიდენტმა, ვლადიმერ პუტინმა ციმბირში საგანგებო მდგომარეობა მას შემდეგ გამოაცხადა, რაც მდინარეში 20 000 ტონა ნავთობი ჩაიღვარა. აღნიშნული ინციდენტი მაშინ მოხდა, როდესაც საწვავის ავზი ქალაქ ნორსილსკის ელექტროსადგურში ჩამოინგრა.

აღნიშნული ფაქტის შესახებ სამთავრობო პირებმა მხოლოდ ორი დღის შემდეგ შეიტყვეს. საწარმო, რომელიც “NORILSK NICKEL”- ის საკუთრებაშია, მსოფლიოში წამყვანია ნიკელისა და პალადიუმის წარმოებაში. მომხდარი ინციდენტის გამო ვლადიმერ პუტინმა საჯაროდ გააკრიტიკა კომპანიის ხელმძღვანელობა.

ზემოხსენებული მოვლენა მაშინ მოხდა, როდესაც ელექტროსადგურზე საწვავის ავზის საყრდენებმა ჩაძირვა დაიწყო. ნავთობი გაჟონვის შემდეგ 12 კილომეტრზე გაიშალა , რომელმაც მდინარე ამბარნაია ალისფრად შეღება.

გავრცელებული ინფორმაციით მომხდარი ინციდენტის განსაკუთრებული საშიშროება იმით აიხსნება, რომ მდინარე, რომელშიც ნავთობი ჩაიღვარა, ჩრდილოეთ-ყინულოვან ოკეანეს უერთდება და არის საფრთხე რომ ნავთობმა ეკოლოგიას მიმდებარე ტერიტორიაზე სერიოზული პრობლემები შეუქმნას.

რუსი ეკოლოგისტების თქმით, ეს რუსეთის ისტორიაში ნომერ მეორე უმძიმესი კატასტროფაა, რომელიც მძიმე მომავალს უწინასწარმეტყველებს ბუნებას. ნავთობმა 350 კვადრატული კილომეტრის ტერიტორია დააბინძურა. გარემოს დამცველი ჯგუფების თქმით, ნავთობის დაღვრის მასშტაბებიდან და მდინარის გეოგრაფიიდან გამომდინარე, ძალზე გართულდება დაბინძურებული წყლისა და ტერიტორიის გაწმენდა.