მედიკოსების დაუდევრობა და ინფიცირებული პაციენტის სახლში გაწერა

მედიკოსების დაუდევრობა და ინფიცირებული პაციენტის სახლში გაწერა - რას ამბობს ამირან გამყრელიძე

COVID-19 - 13:05, 03 Jun, 2020

890

მედიკოსების შესაძლო დაუდევრობა და ინფიცირებული პაციენტის სახლში გაწერა - თემაზე განმარტების გაკეთება დღეს ამირან გამყრელიძეს მოუწია.

დაავადებათა კონტროლის ეროვნული ცენტრის ხელმძღვანელი ამბობს, რომ გავრცელებული ინფორმაცია, რომ ნინოწმინდაში ინფიცირებულთა ტესტის შედეგები აერიათ და კლინიკიდან გამოჯანმრთელებულის ნაცვლად ინფიცირებული გაწერეს, არასწორი ინტერპრეტაციაა.

მთავარი ინფექცინისტი სიცრუეს უწოდებს კიდევ ერთ ინფორმაციას, რომლის მიხედვითაც კაცის კორონავირუსით ინფიცირების შესახებ ექიმებისთვის ცნობილი გაწერიდან ორი დღის შემდეგ გახდა.

"კვლევა მიმდინარეობს, ტესტების არევა არ მომხდარა. კარანტინში ორჯერ გაიტესტა და ახლა ხდება მისი განმეორებითი ტესტირება. რატომღაც ერთი ტესტის საფუძველზე გაუშვეს, როცა მეორე იყო სუსტად დადებითი. ახლა ხდება მისი ჩაღრმავებული კვლევა. სისხლის გამოკვლევა მოხდება. ის გადაყვანილია გორის ჰოსპიტალში და ვფიქრობთ, რომ არაფერი განსაკუთრებული იქ არ იქნება.

არ არის სწორი ინტერპრეტაცია, რომ ორი დღის შემდეგ აღმოაჩინეს. ის იდენტიფიცირებული იყო, გარკვეულ შეუთანხმებლობას ჰქონდა ადგილი, რომელსაც ახლა ვიკვლევთ. დიდი ალბათობით, ეს ადამიანი არის გამოჯანმრთელებული. აიღებენ სისხლს, გამოიკვლევენ ანტისხეულებზე და მე დარწმუნებული ვარ, რომ დიდი ალბათობით, ჩვენ იქ ინფექცია არ გვაქვს", - აცხადებს გამყრელიძე.

ნინოწმინდის სოფელ ყარუმაში მერის წარმომადგენელი ეგორ თოროიანი ამბობს, რომ ინფიცირებული პირი საქართველოში რუსეთიდან ჩამოვიდა, 18 დღე იზოლაციაში იყო, 31 მაისს სახლში გაუშვეს.

"არ ვიცი, მოხდა თუ არა შეცდომა, მგონია, რომ კორონავირუსი არ აქვს. კონტაქტი ბევრთან ჰქონდა", - თქვა მან.

მამაკაცი გორის სამხედრო ჰოსპიტალშია გადაყვანილი.