მაიმუნების ე.წ ბანდა თავს დაესხა ჩრდილოეთ ინდოეთის სამედიცინო კოლეჯის თანამშრომელს, რა დროსაც ცხოველებმა კორონავირუსით დაინფიცირებული პაციენტის სისხლის ნიმუშები გაიტაცეს- აღნიშნულმა ფაქტმა კი ადგილობრივებში პანიკა გამოიწვია.თავდასხმა განხორციელდა დღისით სამედიცინო კოლეჯის კამპუსში ქალაქ მეერუტში.

გავრცელებული ინფორმაციით, ლაბორანტს კოვიდ ინფიცირებული 4 პაციენტის სინჯები გადაჰქონდა , რომელიც უნდა გამოეყენებინათ კოვიდ 19-ის სამკურნალო პრეპარატის შესაქმნელად. უეცრად კი მაიმუნები თავს დაესხნენ მედიკოსს და სისხლის ნიმუშები გაიტაცეს.

მედიცინის ასოციაციის ხელმძღვანელთა თქმით, ამ დრომდე უცნობია ჰქონდა თუ არა ადგილი ქურდების მიერ სისხლის ნიმუშების გახსნას და შიგთავსის დაღვრას. მომხდარი ინციდენტის ამსახველი ვიდეოკადრები ტვიტერის საშუალებით გავრცელდა მედიაში. მეერუტის მოქალაქეები შიშობენ, რომ მაიმუნებმა შესაძლოა ზემოხსენებული სისხლის ნიმუშები საცხოვრებელ ზონაში დაღვარონ, რაც ხელს შეუწყობს ვირუსის უფრო ფართოდ გავრცელებას, რომელმაც უკვე 4700-ზე მეტი ადამიანი იმსხვერპლა ინდოეთში.