აშშ "ღია ცის შეთანხმებიდან" გამოდის, რაშიც რუსეთს ადანაშაულებს

მსოფლიო - 21:28, 21 May, 2020

953

ამერიკის შეერთებულმა შტატებმა გადაწყვიტა ცალმხრივად გამოვიდეს ე.წ. "ღია ცის შეთანხმებიდან", რადგან რუსეთმა არაერთხელ დაარღვია მისი პირობები. ამის შესახებ აშშ-მ თავის პარტნიორებს ინფორმაცია უკვე მიაწოდა, ხოლო რუსეთს საქმის კურსში ოფიციალურად 22 მაისს ჩააყენებს.

კულუარული ინფორმაციის თანახმად, ეს გადაწყვეტილება ამ ხელშეკრულების შესრულების ნახევარწლიანი ანალიზის შედეგად იყო მიღებული, რომლის თანახმადაც, რუსეთმა არაერთხელ დაარღვია მისი პუნქტები და უარი განაცხადა მათ შესრულებაზე.

რუსეთმა პრესაში გასულ ინფორმაციას აშშ-ის მიერ შეთანხმების დატოვების შესახებ სამწუხარო ფაქტი უწოდა.

-------

"ღია ცის შეთანხმების" მიხედვით, რომელიც 1992 წელს 35 სახელმწიფოს შორის დაიდო, მონაწილე სახელმწიფოები თანხმდებიან, რომ ისინი თავიანთ ტერიტორიაზე დაუშვებენ სადამკვირვებლო ფრენებს, რათა ჰქონდეთ ლეგალური ინფორმაცია ერთმანეთის სამხედრო პოტენციალის შესახებ.

საგულისხმოა, რომ ხელშეკრულების ქვეპუნქტის მიხედვით, ხელშეკრულების წევრებს ეკრძალებათ ფრენების განხორციელება, წევრი ქვეყნის ტერიტორიის იმ ნაწილზე, რომელიც 10 კმ-ზე ნაკლები მანძილით არის დაშორებული ისეთი მესამე ქვეყნის საზღვრიდან, რომელიც არ მონაწილეობს ხელშეკრულებაში.

აღნიშნული პუნქტი რუსეთმა 2010 წელს გამოიყენა, ხელშეკრულების დანარჩენი წევრი სახელმწიფოებისთვის საქართველოს ოკუპირებული ტერიტორიების, აფხაზეთისა და ცხინვალის რეგიონის ე.წ საზღვრებთან 10 კმ-ზე ნაკლებ დისტანციაზე მიახლოების შეზღუდვის მიზნით. საქართველოს მხრიდან 2-წლიანი მოლაპარაკებები უშედეგოდ დასრულდა, რის შედეგადაც 2012 წელს საქართველომ განაცხადა, რომ საქართველო აღარ მიიღებდა თავის ტერიტორიაზე სადამკვირვებლო ფრენებს რუსეთის ფედერაციის მონაწილეობით, ამასთან, თანასწორობის პრინციპიდან გამომდინარე, არ განახორციელებდა სადამკვირვებლო ფრენებს რუსეთის ფედერაციის ტერიტორიაზე. საგულისხმოა, რომ საქართველო დარჩა ღია ცის შესახებ ხელშეკრულების მონაწილედ ყველა სხვა სახელმწიფოსთან მიმართებაში.