რა თანხმლები დაავადებები ჰქონდათ კორონავირუსით ინფიცირებულებს საქართველოში - დაავადებათა კონტროლის ეროვნული ცენტრის კვლევის თანახმად, კორონავირუსის მიმდინარეობისას თანმხლებ დაავადებებს შორის ყველაზე ხშირი იყო ჰიპერტენზია (10%), დიაბეტი (4%) და თირკმლის დაავადება (2%). ქალებში, ზოგადად, თანხმლები დაავადება უფრო ხშირი იყო, კაცებთან შედარებით.

რაოდენობის მიხედვით, სტაციონარში მოთავსებამდე თანმხლები დაავადებების მონაცემები ასე ნაწილდება:

ჰიპერტენზია დაუდასტურდა 48 ადამიანს,

დიაბეტი 20-ს,

თირკმლის დაავადება 10-ს,

ფილტვის ქრონიკული დაავადება 8-ს,

ქრონიკული ნევროლოგიური დაავადება 8-ს,

კიბოს დიაგნოზი ჰქონდა 4 ადამიანს, ღვიძლის დაავადება კი 2-ს.

კვლევის ჩასატარებლად ავტორებმა გაანალიზეს სტაციონარიდან გაწერილი 168 ადამიანის მონაცემები, რომელთაგანაც თანმხლები დაავადებები, სულ, 17-ს ჰქონდა. აქედან 7-ს ჰქონდა ჰიპერტენზია, დიაბეტი ჰქონდა 1 პაციენტს, გულ-სისხლძარღვთა დაავადებები 4-ს, ქრონიკული რესპირაციული დაავადება 1-ს, ავთვისებიანი სიმსივნე 3-ს, ვირუსული ჰეპატიტი კი 1 მათგანს.

ფოტო: NCDC

კვლევის მიხედვით, სტაციონარიდან გაწერილი 168 ადამიანიდან რეგისტრირებულია გამოჯანმრთელების 162 შემთხვევა, 6 შემთხვევა კი დასრულდა ლეტალურად [ლეტალობის მაჩვენებელი – 3.6%]. გარდაცვლილთა შორის უმეტესობა 70 და უფროს ასაკობრივ ჯგუფს მიეკუთვნება.

11 მაისის მონაცემებით, ქვეყანაში სულ გარდაცვლილი იყო 10 ადამიანი. COVID-19-ით გარდაცვლილთა შორის, თანმხლები დაავადებებიდან ყველაზე ხშირი სისხლის მიმოქცევის სისტემის დარღვევები იყო, რომელიც საერთო რაოდენობის 77%-ს შეადგენდა.

ფოტო: NCDC

19 მაისის 14:30 საათის მონაცემებით, საქართველოში სულ დადასტურდა 702 შემთხვევა, მათ შორის, გამოჯანმრთელდა 456 და გარდაიცვალა 12 პაციენტი.

დაავადებათა კონტორლის ეროვნული ცენტრის თანახმად, ამ ტიპის ანალიზი პანდემიის პერიოდში თვეში ერთხელ რეგულარულად განახლდება.